June 18, Thawhleh zan khan Turkey leh Georgia te Euro 2024 khelh mekah an inhmachhawn a. Inelna neih meka inkhel hmuhnawm ber ang hiala mi tam takin an ngaihah Turkey in 3-1 in hnehna an chang a, point thum nen inelna bul an tan.
BVB Stadion Dortmund a inkhelah Euro a chetthat harsar thin Turkey leh Euro a hmel thar Georgia ten an inhlau lo tawn hle a. Goal thun tumin an innawr tawn miah miah. Tu lam mahin goal ven di de an tum lova, inngam aka innawr in, inkhel hmuhnawm danglai tak an lantir. He inkhel hmuhnawm takah hian Turkey rawlthar Arda Guler chuan goal ropui zet mai a thun a, point thum an hmuh theih nan hian kum 19 mi Guler hian a thawh hlawk hle a. Inkhel a zawh meuh chuan football khawvelin an ngaihven thar hluai a ni ber mai.
Turkey hian rin lawk ang ngeiin Fifa ranking-ah 75-naa awm mek Georgia lakah bul an tan tha a, goal pawh an thun har lo. Mert Müldür chuan minute 25-naah hmahruaina goal a thun. Team lian zawk an ni a, goal an thun hma vangin awlsam taka chak thei tura ngaih an ni hman. Chutihlai hian nuam ti taka inlan Georgia in hlauh nei map lovin an khingpuite an nawr ve thung a, Georges Mikautadze chuan minute 32-naah goal thunin an si phurh a sut. 1-1 a nih hnu hian Turkey in goal thun leh thuai mah se hnawl a ni thung.
Hun rei tak goal a luh zui loh hnuin Arda Guler chuan minute 65-naah goal ropui a thun a. Georgia in goal thun tuma an nawr nat luat an tuar a, an si nghak a chhuak ve daih bawk bawn nen minute 90+7-ah Kerem Aktürkoglu chuan goal rualah pet goal in Turkey goal thumna a thun a, point thum an hmu chiang ta a ni.