Chhingchhip-a Fruit Juice Concentrate Plant chu nimin khan Lalthazuala Rawite, MIFCO Chairman chuan tlawhin ZPM sawrkar hnuah a vawi khat nan Sapthei sawr bul tan a nih thu a sawi a, hmanrua leh mamawh chi hrang hrangte he hmun tuaitharna turin sum awm se la chuan lian zawka hmalakna kalpui theih a nih thu a sawi.
Mizoram Food & Allied Induatries Corporation Limited (MIFCO) hnuaia Fruit Juice Concentrate Plant hi 26th January, 1993 khan din a ni tawh a, thei chi hrang hrang sawngbawlna turin khawl leh mamawh tam tak lei ni tawh mahse hman loha dah tawl tam tak a awm a, hengte hi tangkai taka hman a nih theih thu sawiin Lalthazuala Rawite chuan, ‘Sum chu awm se heng khawl zawng zawng hi tangkai taka hman theih tur an ni a, MIFCO tangkaina leh Mizoram hmasawnna tura a thawhhlawk zia pawh kan hmu thuai ngei ang. Tun dinhmunah erawh bul tan thar leh chauh kan nih avangin hmabak a tam hle a ni. Tuna sapthei tui kan sawr mek hi enchhin nan Chawngtlai khua atangin Kg 1, Rs.30 (Rs.30/kg) a kan lei a, Sapthei bakah Lakhuihthei pawh sawr kan tum, he hmunah hian sawr theih chi thei chi hrang hrang pawh sawngbawl theih beisei a ni. Heng bakah hian Baibing leh Rawtuai te pawh a Tin-a siam theih a ni bawk a, hma kan la zel dawn a ni. Ei leh bara kan intodelhna tur leh kan ram dinchhuahna tur chuan kan thlai chi hrang hrangte awmze neia kan sawngbawl a ngai a, kum tam tak MIFCO hi kalpui ni tawhin, la hlawhtling hlei thei rih lo mahse ZPM Policy a nih avangin keini chuan hlawhtlinpui kan tum tlat dawn a ni,” a ti.
Chhingchhip khaw daia Mizoram Food Park ah hian tun dinhmunah hnathawk 6 an awm mek a, MIFCO hnuaiah hian hnathawktu tun dinhmunah 24 an awm mek a ni.