Ningani zan khan Bethlehem Vengthlang YMA Hall-ah kum 2024 a Bethlehem Vengthlanga chêng zirlai HSLC leh HSSLC pass-te lawmpuina leh chawimawina hun chu Bethlehem Vengthlang Branch YMA bul tumin hman a ni a, he hun hmanpuitu bialtu AMC corporator R.Lalawmpuii, ZPM Zonu Headquarters President chuan zirlai kalkhawmte fuihin, ‘Hlawhtlinna chan hi a nuamin, a hlimawm a, nimahsela, hlawhtlinna kawngpui chu a bumboh thin a ni’, a ti.
R.Lalawmpuii chuan,”Zirlaite hian nunkawng uluk taka hman a pawimawh hle a, ruih theih thil leh zuk leh hmuam laka inthiarfihlim tlat turin ka duh che u a ni, mahni inthunun theihna hi hringnuna thil pawimawh tak a niba, social media leh mobile phone hman kawngah pawh zirlaite chuan chin tawk neih thiam a ṭul hle a, mi hlawhtling tawh te’n an hun awl hnawhkhah nan social media an hman thinte hi zirlaite tân chuan thil tih ve ngawt chi a ni lo,” a ti bawk.
Ward-16 bialtu corporator R.Lalawmpuii chuan zirlaite chu kohhran leh khawtlânga inhman kawngah fimkhur tura chahin,”Zirlaite chu an zir zawh hunah an thiamna hmangin kohhran leh khawtlang tân malsawmna an la ni thuai dawn a, khawtlang leh kohhran hrang hranga ṭhalai hruaitute pawhin zirlaite chu hla zir, hnatlâng leh activity dang dangah-te a kula ataia tel turin phut lo se ka duh hle a, khawvel thiamna leh changkanna sang chho zel chu zirlaite pawhin a tha zawnga hmasawn nan hmang thiam se ka duh a ni” a ti.
Pass tharte puala inkhawm hi Ralthuama Ralte, President, Bethlehem Vengthlang Branch YMA chuan kai hruaiin, Lalrintlingi Sailo-in hun serh a hmang a, he hunah hian Bethlehem Vengthlang huam chhunga cheng HSLC leh HSSLC pass thar mi 200-te hnenah momento leh Lalhruaitluanga ziak ‘Zirna Lamtluang’ tih lehkhabu pêk an ni.