Euro 2024 khelh mekah Ningani zan khan inkhel ngaihven hlawh tak a awm a, champion lai Itlay leh champion tura rinkai Spain an inhmachhawn. Inkhel hmuhnawm takah Riccardo Calafiori own-goal hmangin Spain in hnehna an chang a, last 16 an lut. Spain lakah an tlawm vangin Italy dinhmun a derthawng takah a ding.
Champion lai Italy leh champion tura rinkai Spain te hi Arena AufSchalke-ah an inhmachhawn a, Euro 2020 semi-final rematch an khel. Italy hian Euro 2024-ah bul an tan tha lova, team teanau zawka ngaih Albania lakah goal an chhuah hmasa a, Fifa ranking-ah 66-naa awm mek Albania hi an lehthal thei hram chauh a, harsa takin point thum an hmu.
Italy in bul an tan that loh laiin Spain erawh chuan duhthusama thain bul an tan ve thung. Euro last 16 atanga an hnawhchhuah Croatia hmachhawnin bul an tan. World Cup-ah pathumna ni mek Croatia hi 3-0 ngawtin an sawp a, awlsam takin point thum an hmu. Croatia lakah an khelh that em vangin fak a hlawh a, champion turin rin an kai leh zual sauh. Italy laka fiahna an hmachhawn leh tur chu football ngainatute hmuh chak a ni.
Italy leh Spain te hian hmuhnawm takin bul an tan a, an innawr tawk hle. Inkhel a rei a, player nei tha rual zawk Spain an chungnung telh telh a, Italy an nawr buai thei hle. Inkhel hmuhnawm takah chawlhlawk hmain goal lut a awm thei lo phawt.
Chawlhlawk hnu lamah inkhel hmuhnawm zawk hmuh tur a awm a, goal hmuh tur a awm ta bawk. Second half tan tirhteah Luis de la Fuente team Spain hian na taka an nawr rah an seng a, goal an thawkchhuak ta nge nge. Veilam sir atanga ball cross hlauhawm tak chu defender ngaihven hlawh Riccardo Calfiori chuan vanduaithlak takin an lamah a dang goal a, Spain hmahruaina goal a thunsak.
Goal an thun hnuin Spain an hlauhawm chhunzawm a, goan an thun belh teuh hle. Derthawng takin Itala an him hram hram zel a, goal chhuah belh em lovin hun an hmang tluan a, Spain lakah uiawm takin an tlawm zui ta a ni.
Team lian pahnih Croatia leh Italy lakah hnehna an chan vangin Spain knock out round an lut a, Group B atanga last 16 lut hmasa ber an ni. Spain hi Euro-ah vawi thum an champion tawh a, Germany nen champion tam ber an ni dun mek. Heng an champion tawhna vawi hnihah hian champion lai an hneh ve ve. Euro 2024-ah champion lai Italy an hneh leh tak vangin an champion kum a nih rinna lian tak a awm. Champion turin player an nei tha tawk a, an player te thawhhona a tha em em bawk.
Spain in last 16 an luh laiin Italy erawh chu dinhmun derthawngah an ding ve thung. Luciano Spaletti enkawl Italy hian point thum hmu tawh bawk mah se Croatia an hmachhawn zui leh dawn a, point thum hmuh a harsa dawn. Croatia lakah tlawm pumpelh a, point an hlawhchhuak thei a nih erawh chuan last 16 luh theihna hun tha tak an nei thung ang. Group match hnuhnung bera an khingpui tur Croatia hian point khat an hmu tawh a, last 16 lut thei turin Italy hneh ngei ngei an mamawh.
Spain lakah vanduaithlak taka an lama goal thu Riccardo Calafiori khan ngaihven a hlawh thar hluai. Bologna tan a khelh that theih em vangin Italy tan a khel chho ta hial a. Albania laka a chet dan hmuhnawm tak vangin Italy defender ropui Maldi nen khaikhin a hlawh nghal hial a. Club lian ten an ngaihven thar hle.