Boruak nei lo England in beisei an phak lo chhunzawm zel a, Euro 2024-a an match hnihnaah an chak zo lo. England hian Denmark lakah goal an thun hmasak zet hnuin an hmahruaina an humhim zo lo a ni mai lova, tlawm an pumpelh thei hram chauh zawk. Group C a inkhel dangah Serbia in Slovenia an draw a, beiseina thar an insiam ve bawk.
Serbia lakah beisei phak lo taka bul tan England hian Frankfurt Arena-ah Denmark an hmachhawn. Denmark hi Euro 2020 semi-final-ah harsa taka an hneh hramte kha an ni a, hneh an awlsam dawn lo tih a rinlawk theih. Gareth Southgate hnuaiah England hian beisei an phak lova, player lar rualte awmze nei lovin, team angin an khel tha tawk lo. Hetihlai hian Denmark erawh player langsar fal awm lo, tram anga thawkho tha zet mai, team anga khel thiam tak an ni thung a, team inang lo tak an ni.
Serbia laka hnehna chang tawh England hian chak mamawh Denmark lakah goal an thun hmasa. Denmark defender inthlahdah zeuh vangin defender tlanchak Kyle Walker chuan fuh takina siam a, box chhungah ball an inpekkual hnuin captain Harry Kane chuan awlsam takin a pet goal a, minute 18-naah hmahruaina goal a thun. Hma takah goal an thun vangin Three Lions an phur a, last 16 an lut chiang teuh nghal viau bawk. Mahse, an goal thun hian Denmark a chhaihkawlh a ni lek fang ta zawk.
An chetsual vanga goal an chhuah hnuin Denmark an insiamtha thuai a, thawk rim leh zual sauhin England an chhaihbuai zui nghal zat. Ball chang tam zawk ni zui ta Denmark tan hian Morten Hjulmand chuan minute 34-naah leihrulah mawi fuh zetin a pet goal a, an si phurh a sut ta nge nge. An si phurh an sut hnuin England an ngam zui viau a, hlauhawm siam tam zawk ni mah se chawlhlawk hmain goal dang an thun belh thei lo a, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, Denmark an khel that laiin England an insiamtha thei chuang lo. Manager Southgate mangangin player a thlakkual a, Alexander-Arnold a lakchhuah hnuin Saka, Fodel leh Harry Kane te a la chhuak zui leh. Boruak rit takin a tuam vel Southgate hian thutlukna a siam sual a, Saka, Foden leh Kane te a lakchhuah hnuin an tlarhma an hriam tawk tawh lova, ha nei lo ang mai an ni tawh. Denmark lakah hian ball chang tlem zawk an nih bakah goal an chhuah teuh thei viau a, an vanneih a siamin derthawng tak chungin an him tluan ta hlauh a, tlawm an pumpelh ta hram.
Denmark lakah tlawm an pumpelh hram vangin England hian khelh hnih atangin point li an hmu a, last 16 lut turin an dinhmun a chhe hran lo. Slovenia hmachhawn leh tur an ni a, point thum hmu thei tura ngaih an ni. Three Lions hian last 16 an luh ngei a rinawm. Last 16 an lut a nih pawhin a mak hran lo, an group a mite hi champion tura rinkai, team lian an awm hran lo tlat. Team teanau zawka ngaih lakah pawh an beisei an phak lo zel a nih chuan team lian an hmachhawn hunah an ngaihtuahawm thei viau tura ngaih a ni.
England lakah mit la taka inlan Denmark hian khelh hnih atangin point hnih an hmu tawh a, last 16 lut thei dinhmunah an la ding. Group match hnuhnung berah point khat hmu tawh Serbia an hmachhawn zui leh dawn a, last 16 lut turin chak an mamawh ang. Dermark ai mahin Serbia hian chak an mamawhna a sang zawk bawk a, inkhel hmuhnawm tak an lantir ngei tura ngaih a ni.