Zirtawpni khan MNF chuan Hnam Run-ah Chhung inkhawm neiin, Lalrinenga Sailo, AMC Mayor leh MNF Adviser ni bawk chuan thu a sawi a, AMC Ward No XIX By-Election lo awm tur atan hian MNF te kan chak ngei dawna an rin avangin ZPM in min huphurh lawk hle a ni, a ti.
Lalrinenga Sailo chuan, AMC Ward No XIX By-Election-a MNF Candidate Dr Lalrinzuali Hrahsel hi campaign a feh chhuah tawhnaah mipuite pawn an ngainat rawn hle a. Kan campaign tawhnaah mipuiteah kan boruak pawh a tha hle a ni. Tluang takin kan bei zel anga, kan Candidate chungah rinna sang tak ward mipuiten an neih belh zel a beisei thu sawiin, chakna chan ngei a beisei thu a sawi bawk.
AMC Mayor chuan, khawvel hi a changkang chho zel a, Technology-ah kan sang chho tawlh tawlh a, social Media in min chenchilhin tun hmaa chanchinbu hmanga thuthar kan hriat thin aia chakin Social Media-in min lo awp bet ta a. Social Media hi mipuite pawhin kan hman thiam a tul thu sawiin, thudik leh dik lo post kawngah finfiah hmasak a tul thu a sawi bawk. AMC hmalakna pawh ZPM ten nasa takin thu dik lo tluantling lo hmangin an theh darh nasa a, Mipuite pawhin thudik hriat kawngah ngaihtuahna fim hman nachang kan hriat zel a pawimawh takzet a ni, a ti.
Lalrinenga Sailo chuan MNF hian kalphung fel leh tha tak kan nei a, hmalam panin kal zel dawn a, MNF hi kum 22nd October, 1961 khan din niin, kum 62 leh Thla 8 kan hmang tawh a, Silver Jubilee leh Dimond Jubilee hmang tawhin, Kan hma lawkah Platinum Jubilee hmang turin kan inruahman mek a ni. Chuvangin, MNF party chu ‘Pathian leh kan ram tan’ tia kal zel tur kan nih angin kan kal zel dawn a, Pathian leh mipuite zarah Sorkarna changin kan la ding chhuak leh ngei dawn a ni, ti bawk.
He hun hi Gogo Lalremtluanga, Gen. Secretary MNF Gen. Hqrs. chuan kaihruaiin, Ramfangzauva, Adviser MNF Gen. Hqrs. in hunserh a hmang a, TC Kaphmingthanga Gen. Secretary, MNF hnen atangin By Election lo awm tur atana an hmalak tawh dan report an ngaithla bawk.