Nimin khan Congress Party chuan Congress Bhavan-ah ‘Friday Political Session’ an hmang a. He hunah hian MPCC Treasusrer Dr Lalmalsawma Nghaka chuan thu sawi in, “Vawiinah hian Congress hian tihtur kan nei, rinawm takin taihmakna nen thawk ila. Mizoram mipuite hian chhanchhuaktu tur an duh a, keini hi huaisen taka kan penchhuah a ngai a ni.
“BJP Sawrkar Modi kaihhruai khan sawiselna an ngaitheilo em em a, anmahni sawiseltute thubuai te siamsak in an nekchep thin. Mizoramah chuan sawrkar kal tawh te khan social media ah pawh sawiselna nasa tak an tawk thin a, an duh chuan an khinglet ve thei ang, mahse an khinglet ngai lo. Tun sawrkar ZPM kaihhruaiah hi chuan insawisel hi an ngaitheilo em em a, Social Media ah pawh sawiselna an ngaithei lo em em a ni. Narendra Modi kaihhruai BJP sawrkar kaldan an entawn a, anmahni sawiseltute an man a, an ban zel mai a ni.
“ZPM Sawrkar-a Minister Lalrinpuii’n Local Council leh Village Council te thawhpui an harsat vanga an term pawhhnaih tumna awm thu a sawi te hi thil pawi tak a ni a, Minister in a sawi awmlo tak niin ka hria a. Hetiang hian tunhma in tu sawrkar mahin an la ti ngai lova, mipui thlan an ni a, hetianga tihtumna a awm hi a pawi hle a ni.
“Central lamah chuan Uttar Pradesh-a tun hnaiah an zirchianna ah Rahul Gandhi chu Prime Minister atan duhtu an tam ber a, Modi PM atana duhtu chu 32% chauh an ni. Chuvangin India ramah hian Congress hma hun a eng em em a ni.
“Tun tuma BJP sawrkarah hian Muslim Minister an awm miah lova, India rama a vawikhatna a ni. NDA hnuaiah hian hnam hnuaihnung te rahbeh leh nekchep an ni a, hnam hnuaihnung MP an tlem hle, INDIA Alliance ah chuan hnam hnuaihnung an tam em em a ni. “India rama BJP sawrkarna hnuaiah hian thil fello a nasa em em a, Electoral Bonds Scheme te kha scam lian em em a ni a, tunah NEET Scam a rawn awm leh ta a, India ramin an buaipui em em a ni.
“Kan chhehvel hnam te chuan BJP leh an thawhpuite an hnawl a, Congress in MLA kan neih lohna Nagaland-ah chuan Congress MP an thlang tling a, Manipur-ah pawh Congress MP an thlang tling a ni, chuvang chuan Mizo mipuite pawn kan inngaihtuah chian a ngai a ni. NEDA a tel te kan awm a, tel chaka issue based a thlawp tum te kan awm hi kan than harh a hun viau in ka hria.
“Vawiinah hian Congress hian titur kan nei, rinawm takin taihmakna nen thawk ila. Mizoram mipuite hian chhanchhuaktu tur an duh a, keini hi huaisen taka kan penchhuah a ngai a ni.” a ti.
He hun hi Tamlal Lohar, Secretary, MPCC chuan a kaihruai a, Er Sanghrima, Secretary, MPCC leh Project Monitoring member chuan thu a sawi bawk a ni. He hunah hian National Eligibility cum- Entrance Test Exam a thil dik lo tak awm duh lohna lantirna hun hman a ni bawk.