Sports Minister Lalnghinglova Hmar chuan nimin khan Hmangaihhlima (Hmaa Hauzel) lehkhabu ziah “Thlantui far (Infiamna thu ngaihnawm)” chu MZP Conference Hall, Treasury Square-ah a tlangzarh.
Lehkhabu tlangzarh puala inkhawm tâwiah Sports Minister Lalnghinglova Hmar chuan thu sawiin, khawvelin mifing a tih te chu lehkhabu chhiar tam leh chhiar zau an nih thu a sawi a. Computer, internet leh smartphone lar hnuah lehkhabu leh ziakmite hlutna tlahniam hman viau mah se, thangthar zingah lehkha chhiar taima an tam zel avangin hma a sawn chho leh mek a ni, a ti.
Mizote chu eizawnna, zirna leh hnathawh kawngah hmasawn tur chuan thlantui far khawpa thawk turin kan inbuatsaih a ngaih thu a sawi bawk.
Hmangaihhlima (Hmaa Hauzel) hi The Aizawl Post chanchinbu-a infiamna column ziaktu a ni a. A lehkhabu ziah, phek 224 a chhahah hian thuziak tawi 35 awmin, sports discipline hrang hranga infiammi langsarte thawhrimna chungchang ziah niin, A man hi Rs. 299 a ni.