Bollywood actress lar Sonakshi Sinha (37) leh Zaheer Iqbal (35) te chu nimin khan an innei ta a, Zaheer-a pa Iqbal Ratansi chuan an mo thar chu Islam-ah a inlet lovang, a ti.
Ratansi chuan, “He inneihnaah hian sakhuana in hmun a chang lovang. Islam-ah a inlet dawn lova, chu chu chiang takin ka sawi thei. Thinlung inpumkhatna tur a nih vangin engtikawng mahin sakhuana hian hmun a chang lovang,” tiin a sawi.
“Humanity hi ka ring bur mai a, Hindu-in pathian hi ‘Bhagwan’ an ti a, Muslim te’n ‘Allah’ an ti bawk. A tawpah chuan kan zavai mai hian mihring vek kan lo ni reng mai,” a ti bawk.
Bollywood legend Shatrughan Sinha fanu Sonakshi leh Zaheer te hi sakhuana thuhmun vuan an ni lova, hei vang hian sakhaw serh leh sang te nen inneih an tum lova, civil ceremony hnuaiah an inkutsuih ang.