Euro 2024 a bul tan tha lo, Slovakia laka tlawm nghal Belgium an insiamtha a, inrinni zana an khingpui Romania lakah si hnih faia hnehna changin point thum an hmu. Group E a mi ten khelh hnih atangin point thum theuh an hmu a, Euro record thar an siam.
- Belgium 2-0 Romania
An khelh hmasak berah Slovakia hneh lova tlawm nghal Belgium hian Cologne Stadium-ah point thum hmu tawh Romania an hmachhawn. Last 16 lut thei tura tlawm thiang tawh lo Belgium hian hnehna chan ngei tumin tan an khawh a, manager manager Domenico Tedesco chuan Slovakia hmachhawn team atangin player pali a thlak. Tedesco hian Mangala, Ferreira, Debast leh Leandro Trossard te thlakin, Jan Vertonghen, Theate, Youti Tielemans leh Dodi Lukebakio te an luhtir a, a tifuh hle. Aston Villa midfielder Youri Tielemans hian inkhel tan atanga second 70-na lekah hmahruaina goal a thun nghal. Second 70-na lekah Tielemans goal thun hi Belgium in major tournament-a goal an thun ran ber a ni nghe nghe.
Belgium hmahruaina goal thuntu Tielemans hian Leicester City atangin Aston Villa a zawm a, a ti fuh hran lo. Season liam tan khan Villa tan inelna hrang hrangah vawi 32 a khel a, goal hnih chauh a thun. Villa tan a khelh that loh vangin ram tan hmun a chang lo zui a. Romania lakah bul tanin, hmahruaina goal a thun a, inrintawkna a nei thar leh ngei tura ngaih a ni.
Hma takah goal an thun vangin Belgium an khel tha chhunzawm a, Kevin de Bruyne a hmuhnawm thei viau a. Manchester City winger Jeremy Doku chu Romania tan a hnawk thei viau bawk. Hun rei tak chhung goal a luh belh thei lova, Romani pawhin goal thun theihna hun tha an neih an chhawr tangkai thei lo bawk. Goal a luh belh theih loh reng hnu, hun tawp dawn hnaih minute 80-naah midfielder ropui Kevin de Bruyne chuan Belgium goal hnihna thunin an hmahruaina a tiau. De Bruyne goal thun hnu hian goal dang a luh belh thei tawh lo va, Belgium chuan point thum hlu tak an hmu zui ta a ni.
Romania lakah hian Belgium striker Romelu Lukaku a khel tha viau a, a hlauhawm thei hle. Lukaku hian khel tha viau mah se a vanduai chhunzawm zel thung a, a goal thun pawmsak a ni lo leh pek. Belgium tana goal thun hnem ber Lukaku hian Euro 2024 ah goal thum a thun tawh a, VAR hmanga endik a nih hnuin a goal thunte hi hnawl a ni vek thung. A goal thun tawhte hi pawm ni vek se top scorer nih theihna hun tha tak a nei. A goal thun hnawl zel a nih vangin goal nei lovin khelh hnih a tlingtla ta thung a, a khawngaihthlak zawk hle.
- Point thum vek
Zirtawp zan khan Group E a team hnih Ukrain leh Slovakia te chu Düsseldorf Arena-ah an inhmachhawn a. Romani lakah 3-0 ngawta tlawm Ukraine in Mykola Shaparenko leh Roman Yaremchuk te goal thun hmangin hnehna an chang let a, point thum hlu tak an hmu. Belgium hnehtu Slovakia lakah 2-1 a hnehna an chan vangin Ukraine hian last 16 luh beiseina thar an nei.
Group E-a team pali ten khelh hnih atangin point thum vek an hmu. Hei hi Euro chanchinah group match khelh hnih atanga team li ten point thum vek an hmuh vawi khatna a ni. Point thum vek an hmuh vangin last 16 lut tur leh tla tur a la chiang lo tak zet a, group match hnuhnung berin ngaihven a hlawh tak zet dawn. Ukraine hian Belgium an hmachhawn zui leh dawn a, fiahna hautak an hmachhawn ang.