Germany khawpui hrang hranga khelh mek Euro 2024 chu inrinni zan khan round 1 khelh zawh a ni ta a, champion tura rinkai Portugal chuan Turkey hnehin last 16 an lut. Turkey an hneh tum hian player ropui Cristiano Ronaldo chuan assist ngah record a nihrual a, Euro-ah hnuhma ropui dang a hnutchhiah belh.
Czech Republic lakah hmuhnawm taka inlan chunga goal thun tam thei lo Portugal hi point thum hmu tawh Turkey lakah hmuhnawm takin an inlan a, Turkey laka Portugal result ni awm renga mawi hlawhchhuakin, 3-0 in an chak. Roberto Martinez team te hian khelh hnih atanga point ruk hmuin last 16 an lut chiang tawh a. Georgia an hmachhawn hunah an player thate an hahdamtir thei dawn.
BVB Stadion Dortmund ah Portugal leh Turkey in inkhel hmuhnawm an lantir a, goal pawh a lut har lo. Player nei tha rual tak Portugal hian fuh zetin an khingpuite an nawr tlang a, minute 21-naah Manchester City midfielder Bernardo Silva chuan fuh zetin a pet goal a, hmahruaina goal a thun. Hma takah goal an thun vangin Portugal an phur a, inrintawkna sang zawk nen an inlan zui thei phah bawk.
Major tournament-a an la hneh ngai loh Portugal lakah goal an chhuah vangin Turkey an talbuai a, goal an chhuah belh leh thuai. Portugal hian fuh ang reng takin an khingpuite an nawr a, ho lam takin ball an inpe sual tlat thung. Portugal tana ball awmze nei tawh lo hi Turkey defender Samet Akaydin chuan hawichhuak map lovin si ngak a pass ri ngawt a. Si nghak Bayindir man phak lovin goal-ah a lum lut ringawt a, minute 28-naah Portugal goal hnihna a thunsak ringawt. Team lian Portugal lakah si hnih faia an hnufual hnuin Turkey hi phum ang hlauh an ni a, thochhuak tur an awm tawh lo. Khel tha zui viau mah se Portugal pawhin chawlhlawk hmain goal an thun belh thei tawh bik lo bawk.
Chawlhlawk hnu lamah Portgugal an khel tha chhunzawm a, goal an thun leh thuai. Minute 56-na lekah fuh zetin an khingpuite an nawr tlang a, si nghak chauh a hmachhawn tawh laiin Cristiano Ronaldo chuan pet goal tum lovin Bruno Fernades tan fuh zetin a siamsak a. Manchester United midfielder Fernandes hian awlsam taka pet goalin Portugal goal thumna a thun a, an hmahruaina a tizau leh zual a, an chakna a nemnghet.
Goal thun theihna hun tha nei chunga thiante tan siamsak ta zawk Cristiano Ronaldo hian fak a hlawh zui hle. Portugal manager Roberto Martinez chuan Ronaldo chet dan hi thil mawi, academy player te tana zirlai tha tak a nih thu a sawi. Goal thun lo mah se Ronaldo hian Euro-ah assist vawi 8 a nei tliang chiah a. Euro-a assist ngah ber ni thin Czech Republic player Karel Poborsky record a nihrual a, Euro-ah hnuhma thar a hnutchhiah belh. Assist ngah lama Ronaldo record nihrualpui Paborsky hian kum 2006 daih tawh khan International football a lo chawlhsan tawh a. Euro khel hnem ber leh goal thun hnem ber record siam tawhtu Ronaldo hian Assist ngah ber record thar a siam zui theih a rinawm.
Goal thun thei a nih laia assist thlang zawktu Ronaldo hian a puitlinzia a lantir a ngaih a ni. Portugal tan hian goal 130 zet thun tawhin football piang tawh zawng zawng zingah ram tan goal thun hnem ber a ni mek a. Euro-ah goal 14 thun tawhin, Euro-a goal thun tam ber a ni fal mek a, hei bakah hian UEFA Champions League-a goal thun hnem ber a ni mek bawk. Hengte vang hian a mimal tan goal thun tumin a tuihal huam huam hran lova, goal thun a thupui ber hek lo. Ram tan, Portugal chak nan erawh goal thun a la tum zel thung. Kum upa tawh lam ni bawk mah se Portugal tan player pawimawh leh hruaitu ropui a ni chhunzawm zel a ni.
Tarlan tawh angin Portugal hian khelh hnih atanga point 6 hmuin last 16 an lut chiang tawh a, group match hnuhnung berah point khat hmu tawh Georgia an hmachhawn zui leh dawn a. Georgia an hmachhawn hunah hian captain Ronaldo an hahdamtir a rinawm.
Inrinni zana inkhel dangah Euro khel mek zinga ranking a hniam ber leh Euro a hmel thar awmchhun Georgia chu Czech Republic lakah hmuhnawm takain an inlan a, chak theihna hun tha an neih chhawr tangkai zo lo mah se tlawm an pumpelh a, 1-1 in an inhnehtawk.