Nimin khan ZPM chuan Party Office-ah chhung inkhawm hun kan hmang a, he huna thusawitu Lalthansanga, Minister, EF&CC & Fisheries chuan, “Kalphung thar mipui sawrkar kan din mekah vawi leh khata kalphung thlak thut hi mipuiten kan zo lo tih kan hria a, chuvangin zawi zawiin mipui rilru leh hnathawktute kawng dik kan zawhpui dawn a, dik leh rinawm taka thawktuten malsawmna an dawng ang. Sangha-ah intodelh kan tum a, kan Sangha thar hmanga Mizoram chawm kan tum,” a ti.
Minister Lalthansanga (Chatea) chuan, “Mizoram kaihruai tawhtuten kalphung dika ram an kaihhruai theih reng laiin dik tawk chiah lovin a hrulah rei tak an lo kal tawh a, tun dinhmun hi kan thlen phah ta a ni. Tunah hian kalphung tharah kan lut ta chiah a, hun inthlak danglam (transition period)-ah Mizoram kan awm mek a, dik lo taka contract hna leh thil dang thawktute keini chuan kan hrem ngam dawn a, ram mipuite thil danglam kan hmuhtir dawn a ni. Sawrkarna kan chelh tirh, hna kan thawh hma hauh atangin thudik hrulah miten min beih dan tur an zawng nghal char char a, mahse hei hian min tihnual dawn lova, min tichak zawk a ni. Vawi leh khata kalphung thlak thut hi mipuiten kan zo lo tih kan hria a, chuvangin keini chuan zawi zawiin mipui rilru leh hnathawktute kawng dik kan zawhpui dawn a, kan ram siamthatna tur kawng hrang hrangte, kan hmachhawp chin ang zelah dik taka kalpui kan tum dawn a ni. ZPM sawrkarah Mizoram thalaiten inrintawkna leh beseina an nei thar a, an thahnemngaihna leh duhthawh luatah na tak tak pawhin min sawi ang. Mahse hengte hi kan insiamthatna tur leh chak zawka kan kal theihna tur a ni,”a ti.
Fisheries Department changtu ni bawk Lalthansanga, Minister chuan, “Hma thar lak tumin kan inpuahchah mek a, sangha khawi tumite tan sangha chi kan sem dawn a, a chi man atanga 70% chu sawrkar tum tur a ni. Vawiin thlenga Sangha-a kan la intodelh lo hi kan vei a, kan sangha thar ngei hmanga Mizoram chawm kan tum mek a ni. Project lian kan thehthlak zinga pakhat phei chu Central lamin min pawmpui tawh a, chuvangin hetiang lam tuipuite lo inkau ula, hma kan la thuai ang. Chutiang zelin Sericulture Department hnuaiah hma thar lak kan tum a, Central sawrkarin Mizoram hi Muga silk-ah beiseina a nei sang a, India hmarchhak huapin kan hma lawkah hian Aizawlah inhmuhkhawmna neih tur a ni nghe nghe. Kan laka ram mipui beiseina kan hria a, chumi tihlawhtling tura thlan kan nih angin mei kawhin kan tang mek a, he ram tungdinga hmasawnna hnukpui kan haichhuah theihna turin ram mipuite min tawngtaipui a, theihtawp min chhuahpui turin kan sawm a ni,“ a ti bawk.
ZPM chhung inkhawm hun hi Jeje Lalpekhlua, MLA, ZPM Thalai Headquarters President chuan a kaihruai a, Upa PC.Lianngura, Jt.Secy, Upa Committee chuan hunserh hmangin Rev.Dr.K.Thanzauva, Consultant, Education pawhin thusawina hun a hmang bawk a ni.