Euro 2024 a Group ngaihven hlawh ber Group B chu thawhtan zan khan chin fel a ni a, Group champion ni chiang tawh Spain chuan si khat faiin Albania an hneh a, point 9 hmuin last 16 a lut. Thawhtan zana inkhel ngaihven hlawh berah champion lai Italy chuan vanneihthlak takin Croatia lakah tlawm an pumpelh a, last 16 an lut ve bawk.
- Spain an chungnung
Euro 2024-ah group ngaihven hlawh ber, ‘Group of death’ tih hialah Group Leader ni chiang tawh Spain hian Düsseldorf Arena-ah inelna neih mekah hmuhnawm taka inlan Albania an hmachhawn. Manager Luis de la Fuente chuan a player thate awltirin khel tlem zawkte hun tha a pe a, an that dan berin Albania an hmachhawn lo. A that dan berin inlan lo mah se an khel tha leh viau tho thung a, team lian Italy leh Croatia te nena inchai tawk em em Albania hi an B team in an hneh. An B team pawhin Albania an hneh thei mai hi Spain team thatzia tifiahtu a ni.
Spain tana khel tlem zawk ten manager De le Fuente hmin ngei tumin tan an khawh a, Albania lakah an theihna sang ber an hlan. Chak an tum ngawrh bawka goal pawh an thun har lo. Inkhel tan atanga minute 13-na lekah Ferran Torres chuan hmahruaina goal a thun. Hma takah goal an thun vangin inrintawkna sang zawk nen an inlan chhunzawm a, an khel a hmuhnawm zui hle. Spain in nuamti taka an khelh lai hian team lian zawk laka goal thun hmasa thin Albania an buai a, Italy leh Croatia te lakah tha taka an inlan angin an inlan thei lo.
Team hmuhnawm Spain hian ball chang tamin, hlauhawm siam fo mah se hun tawp thlengin goal an thun belh thei bik lo va, si khat faiin hnehna an chang a, point thum an hmuh belh. Albania lakah an chak leh tak vangin Spain hian khelh thumah hnehna an chang vek a, point hmeuh theih zawng zawng hmuin last 16 an lut.
Khelh thumah tlawm vek mah se Albania hi rin phak baka thain an inlan. Champion lai Italy lakah record siam khawpa rangin goal an thun a, champion lai Italy hian harsa takin an lehthal thei hram. Italy lakah mit la taka an inlan hnuin Croatia lakah hmuhnawm takin an inlan zui leh a, goal thun hmasa zawkah an tang leh a. An hmahruaina humhim zo lo mah se Croatia an hneh teuh hle nghe nghe. Point khat hmuin beiseina sang zawk nen Spain hmachhawn mah se point an hlawhchhuak zo lova, point khat hmu chungin an tla zui ta a ni. Point khat lek hmu chungin tla mah se Group B-a an awmpui ramte ngaihin Albania hi khel chhia an ni lova, inchhuang zui thei tura ngaih a ni.
Khelh thum an chak zawn vangin Spain in champion turin rin an kai leh zual. Euro-ah vawi thum champion tawh Spain hi an game a tha tluang hle. Lui lian, lui dam tak sia tui lian luang mar tha tak, an thawm a nat loh aia tawh khauh zet si ang hi an ni a. Kham leh suar tawn chang nei mah se insawhna lovin an thlaudai a, insawh sil khawpin an insawh na lo. Game tempo vawngtu tha tak Rodri an nei a. Tunlaia holding midfielder tha ber ang hiala ngaih Rodri hian mamawh hunah game a pawt muang a, mamawh hunah game a pawt rang a ni ber mai.
- Italy an vannei
Thawhtan zana inkhel ngaihven hlawh takah champion lai Italy leh thleng sang tura rinkai zinga mi Croatia an inhmachhawn a, Group B-ah pahnihna an inchuh. Point thum hmu zawk zawk last 16 lut chiang nghal tur an nih vangin inkhel a hmuhnawm a, theih tawp chhuahin an tan. An match hmasa pahniha beisei phak lo Croatia in an khel tha ta viau a, Italy lakah goal an thun hmasa.
Leipzig Stadium a inkhel hmuhnawm takah hian chawlhlawk hmain goal lut a awm thei lo zet a, chawlhlawk hnu lamah goal a lut thuai thung. Minute 55-na lekah Croatia player pawimawh Luka Modric chuan Croatia hmahruaina goal a thun. Modric goal thun hi Italy in hun rei tak chhung an sut thei lova, an tlawm hman teuh hle. Tlawm ngei tura ngaih an nih laiin Italy an vannei a, hun pek belh tawp dawn tepah an si phurh an sut. Mattia Zaccagni chuan minute 90+8-ah goal thunin Italy tan goal pawimawh tak a thun a, an tlawm tur a chhan him.
Croatia lakah tlawm an pumpelh hlauh vangin Italy hian khelh thum atanga point li hmuin last 16 am lut. Group A-ah hian point hmuh theih zawng zawng hmu vek Spain chu Group champion an ni a, pahnihna niin Italy an tlang ve bawk. Beisei phak lo Croatia in point hnih an hmu a, last 16 luh beiseina tlem an la nei. Croatia hian point hnih hmu bawk mah se goal difference-ah -3 lai a nih vangin an dinhmun a chhe viau thung. Croatia hi tla chiang tluk an ni a, mi dang result-ah beiseina chhete an la nghat ve hram hram. Dam lo na tak, chat thla mai tur, an la chah em loh vanga la kal rih lo ang mai hi an ni. Croatia hi tlahniam ta duai an ni lova, tun inelna chu an vanduai a kal tluang a ni ber mai.
Group B-ah point box ni tura rinlawk Albania chu beisei phak bakin khel tha thin mah se point khat hmuin an tla chiang ve thung.
Croatia an hmachhawn tum hian Italy defender lar chak tak Riccardo Calafiori chuan yelow card a hmu a, yellow card a hmuh zawn vangin last 16 a hmachhawn thei dawn lo.