Euro 2024 khelh mek chu zanin hian Group E leh F te an inching fel ang a, last 16 lut a hriat kim theih tawh dawn. Zanina inlan tur zingah dar 9:30 a inkhel tur Group E a mi te ngaihven an hlawh hle dawn. Dar 12:30-ah Portugal an inlan dawn bawk.
- Point thum hmu vek group
Group E-a awm ram pali; Belgium, Slovakia, Ukraine leh Romania ten Euro record thar an siam a, khelh hnih atangin point thum an hmu vek. Point thum hmu vek an nih vangin tla thei leh tling thei dinhmunah an ding vek a, hei vang hian an group an inchingfel tur hian ngaihven a hlawh phah hle nghe nghe a ni. Group ngaihven hlawh tak hi ‘a che che sihhlawkah’ tiin an inchin fel a ngai dawn.
Group E a team lian fal Belgium hi Ukraine an hmachhawn dawn a, last 16 lut thei turin Belgium hian tlawm an pumpelh ngei a ngai a, an tlawm thiang tawh lo. Belgium hi Ukraine nen an inhnehtawk a nih pawhin result chhia a ni hran lo naa, group champion ni chung ngeia tlang tumin tan an khawh ang. Belgium hian an match hmasa berah Slovakia hneh lo nghal mah se Romania lakah an insiamtha a, point thum an hmu. Ukraine lakah chak turin inrintawkna sang tak an nei ngei ang.
Ukraine pawh Belgium ang thoin bul an tan tha lova, Romania lakah si thum faiin an tlawm nghal ringawt. Romania laka an mualpho hnuin Slovakia lakah point thum an hmu a, last 16 luh beiseina thar an nei. Belgium lakah tlawm an pumpelh thei a nih chua last 16 lut turin an dinhmun a tha thawkhat ang.
Beglium leh Ukraine te inkhelh rual hian Slovakia leh Romania te an inkhel ve dawn bawk. Point thum hmu tawh ve ve an ni a, team intiat tawk, inhlauh hauh lo tur an ni bawk a, inkhel hmuhnawm tak niin, thil engkim thleng thei a ni. Chak tur zawk rin thiam pawh a har hle.
- Ronaldo a chawl ang em?
Zanlai dar 12:30-ah Group F a mite an inchingfel zui ve leh dawn. He grroup ah hian Portugal chu group champion an ni chiang tawh a. Georgia an hmachhawn hunah Cristiano Ronaldo a chawlh hahdam rin a ni.