- Ruata
Nissan chuan an SUV hmingthang, khawvel hmundangah pawh an hralhchhuah nasat tawh X-Trail SUV chu India ramah a chhuak hnai niin a hriat a, company lam chuan teaser an rawn tichhuak tawh a ni.
Nissan X-Trail crossover SUV huangah te dah thin a ni a. India ramah chuan a elpui ni thei awm ho chu – Jeep Compass, Hyundai Tucson, Skoda Kodiaq, Volkswagen Tiguan leh Citroen C5 Aircross te a ni dawn a ni.
India ram sorkar homologation policy thar hnuaiah he Nissan SUV thar tur hi CBU an tih, completely built unit angin a rawn lut dawn a. India rama siam ni loin siam fel sa vekin rawn lakluh a ni dawn a ni. Heti a nih chuan India ram puma hralhchhuah tur pawh chak takin ram chhung ngeia siamchhuah te angin an pe chhuak pup pup thei dawn lo niin media report thenkhat chuan an tarlang a ni.
He SUV teaser darh mekah hian a hma bawrah V-Motion grille with 2D Nissan badge bakah headlamps split pattern, LED DRL, clamshell bonnet leh thildang kan hmu a. Nissan Shield 360 ADAS suite a ken tel beisei a ni a, 19-inch alloy wheel thar hlak a rawn nei dawn bawk a ni. A dung, a vang leh a san zawng hi a indawt danin 4680mm, 2065mm, leh 1725mm te a ni a, a wheelbase hi 2705mm a ni bawk a ni.
Tuna khawvel hmundanga chhuak mek hi chuan kentel hrang hrang Nissan Connect telematics, 360 degree camera, multi zone climate control, ventilated seat leh Google-based software with Google suite apps te a nei a. A man sang hoah chuan free-standing 12.3-inch touchscreen infotainment system leh 12.3-inch instrument cluster, leh a variant hniam hret hoah 8-inch info unit instrument console te zawk te a awm a. India-spec X-Trail hian heng hi a nei ve ang em tih leh, heng bakah te hian eng nge a kentel ang tih chu sawi chian theih a la ni lo a, hetihrual hian a changkangin hmanraw tunlai ber ber erawh a rawn kentel ngei ngei hmel thung a ni.
A khawl lamah hian 1.5L, 3-cylinder turbo petrol engine a hman hmel a, hei hian 204bhp power leh 305Nm torque te a pechhuak thei dawn a ni. Engpawh ni se, he SUV thar tur hi ngaihchan zel a la ngai dawn a. Khawvel huap company hlun leh tha, Nissan atanga SUV thar tha leh changkang tak India ramin a nei dawn erawh thil lawmawm tak a ni.