MZP General Headquarters Aizawl chuan, vawiin ni 28 June, 2024 (Zirtawpni) chawhma dar 11:30 hian LPS Arena, Falkland-ah Remna Ni 2024 a hmang dawn a. Lalduhoma Mizoram Chief Minister chuan khuallian niin a hmanpui ang.
Kumin 2024 Remna Ni June ni 30 hi Pathianni a nih avangin, MZP chuan June ni 28, 2024 (Zirtawpni) hian a hmang dawn a. Sikul hrang hrang ten an thiam thil an entir bakah Remna atana thawhhlawkte chawimawina thilpek hlan a ni ang.
Kumin Remna Ni-ah hian, Mizoram-in remna leh muanna a neih theih nana kum 1981-a MLA an nihna atanga bang mi pali; JH Rothuama, P. Lalupa, Ngurchhina leh Lalthanzauva te hnenah chawimawina thuziak hlan a ni dawn tih an thuchhuah siamah chuan an tarlang.
He hun hmang tur hian, Minister leh MLA zawng zawng, Sawrkar official, Political Party hrang hrang, NGO hrang hrang leh zirlaite sawm an ni a. He hun ngaihlu apiang tel turin MZP chuan Mizo mipui zawng zawng a sawm a ni. Remna Ni hmanna hun hi LPS leh Zonet-ah live a ni dawn tih an sawi bawk.
MZP chuan Kum 2018 atangin kumtin Remna Ni hi hmun hrang hrangah a lo hmang tawh thin a, Remna leh muanna a awm theih nan thawhhlawk mi hrang hrang; Lal Thanhawla, Laldenga, Lalkhama, Rev. Dr. HS Luaia, Rev. Dr. Zairema, Rev. Dr. Lalngurauva Ralte, Lalduhoma, Rev. Dr. Lalsawma leh Mizoram Kohhran Hruaitute Committee (MKHC) te hnenah chawimawina an lo hlan tawh bawk.