- Ruata
Bajaj mid-capacity power cruiser hmingthang Dominar 400 chu hmel thar nen a lo chhuak leh dawn.
He thu hi Bajaj Auto Executive Director Rakesh Sharma chuan chanchinbumite hmaah a puang a. “Dominar hi a hma aia dinhmun sang zawkah kan chawikang dawn a, kawng hrang hrangin kan thuam tha dawn a ni,” a ti.
Bajaj Dominar 400 hi tarlan tawh angin hmun hla tak nuamsa taka zin emaw khalh emaw theihna tur lirthei ke hnih nei huang, cruiser an tih huanga mi a ni a. Kum 2016 khan rawn tichhuak tanin Royal Enfield te nen pawh a inel viau a. Hetihlai hian beisei aiin India ram mipuiah a tla na nep deuh a. He bike tha leh a khawl pawh chak tha tak hi Bajaj chuan hmel thar leh thil thar dang nen an rawn tharthawh leh dawn a ni.
Bajaj Dominar 400 thar turah hian platform thar hlak kan hmu ang a, heng bakah hian hmanraw changkang leh tunlai ber bera thawm a ni ang a, a man pawh a rawn san hret a rinawm a ni. A nihphung tur kimchang chu sawi theih a la ni lo a, a khawl erawh a hmaa mi ang tiat tho a rawn la nih hmel a ni.
Tuna kan hmuh mek Bajaj Dominar hian 373cc fuel injected liquid-cooled single cylinder khawl, KTM 390 series ho atanga lak a hmang mek a. 6-speed gearbox neiin standard slipper clutch a nei bawk. He khawl hian cylinder khat zelah valve 4 a nei a, Bajaj triple spark plug technology a hmang bawk a. 8000 rpm-ah 35bhp power a pechhuak thei a, 6500rpm-ah 35Nm torque a pechhuak thei bawk a ni.
Dominar kan hmuh mek hian darkar khata kilometre 100 chu second 8.23-ah a thleng hman a. A top speed hi 148kmph a ni mek bawk a ni.
Tun dinhmunah chuan an tlangzarh hun tur hi sawi theih a la ni lo a. Nakum lamah showroom-ah kan hmuh hman hmel thung a, an lo tihchhuah hunah chuan Royal Enfield Himalayan 400, Triumph Speed 400, Hero Maverick 400 leh adangte nen an inel thei dawn a ni.
- Bajaj chanchinthar dang
Bajaj Auto hian an 400cc bike huang zauh an tum mek a, hei erawh chuan hun a la duh hret dawn a. Tangka kum, 2024-25 chhungin an hmalaknan Rs. vbc 800 vel an dah a ni.