Peace Accord MNF Returnees’ Association (PAMRA) General Headquarter Aizawl chuan REMNA NI champhaphak vawi 38-na hman ṭha kan ti a, chutihlai chuan Remna Ni champha hi Sunday anih avangin June 28, 2024 (Zirtawpni) ah PAMRA Gen. Hqrs office, Treasury square, Aizawl-ah hman a ni, tia thuchhuah siamin. He inkhawm hi C. Zoramsiama (Vice President) chuan a kaihruai a, Lalramnghaka Adviser in hunserh a hmang a ni. Tin, Ex-officio Col Lalrawnliana’n thuchah ṭha tak a sawi a, Secretary General C. Lalṭhenlova’n PAMRA hmalakna tlangpui report a pe bawk, an ti.
Mizoram leh Hnam tana Zalenna suala Rammute hian Zalenna (Independent) ngei kan duh nâin, Zoram Mipui leh Pawl hrang hrangte leh Kohhran hruaituten Remna neih an duh avangin June 30, 1986 ah India Sorkar nen Remna signed a lo ni ta a ni. Keini Hnam Sipaite tan chuan kan thutiampui, Ram leh Hnam avanga Nunna chân tate leh tuartu zawng zawngte avangin kan duhthusam a ni lo hle a ni, an ti a.
PAMRA-in Remna (MOS 1986) neih hnuah pawh kan chanvo kan sual zel a ngai te hi kan lungawilohna a pun phah hle a ni. Kum 2024 Remna ni champha vawi 38-na kan thlen hnuah pawh kan In-hmun tihfelsak kan la ni lo leh zel phei hi chu a lungchhiatthlak takzet a ni. In-hmun ber a felloh chuan Insakna (Housing Assistance) phei chu fel ngaihna a awm lova, chuvangin Central Sorkar-in Guideline fel tak siam mahse, Mizoram Sorkar-in a ti buarchuar zo ta a ni, an ti bawk.
- Nimina kal khawmho chuan hetiang hian Resolution an passed:
Kum 2024 chhung ngei hian Maumual (Chaltlang Ram)-a Peace Accord MNF Returnees’ te Inhmun hi min tihfel sak a, LSC min pechhuak (Issue) turin Mizoram Sorkar kan ngen a ni.