ZO Re-Unification Organisation (ZORO) General Headquarters, Aizawl chuan kan unau Zomi, Chinland Council/CNF/Chin Brotherhood..etc te inkar a engemaw thu inhmuh fuh loh avanga buaina awm chu pawi a ti hle a. Heng kan unaute hi thlahkhat thisen a inzawm vek kan ni a. ZORO chuan lungrual taka awm tur leh unau kan nihna ti lang turin a duh a ni, tiin nimin khan thuchhuah an siam.
An thuchhuaha an tarlan danin, ZORO executive committee meeting in a lo rel tawh angin remna palai hna thawh a ni a. Zomi Re-Unification (ZRO) leh ZORO hruaitute inbiakna neih tawh a ni a. Chinland Council/CNF leh ZORO hruaitute inbiakna neih a ni tawh bawk a ni, an ti a.
ZORO hruaitute thlazar hnuaiah a hu hova inbiakna nei leh turin ruahmanna kalpui mek a ni. Inbiakna hi a rang lama neih thuai tum a ni, an ti.
ZO Re-Unification Organisation (ZORO) chu khawvel hmun hrang hranga awm Zofate lungrual tak leh kan insuihkhawm theih nana hmalatu a ni a. Zofate chu unau vek kan ni a, unau inhmelhai a tha lo a ni tih hria a an inhmuh thiam lohna chhunzawm lova ti tawp turin kan ngen a ni. Zofate inkarah remna a awm theih nan ZORO chuan palai hna a thawh chhunzawm zel dawn a ni, tiin an tarlang bawk.