Cricket Association of Mizoram (CAM) sawmna angin MJA General Headquarters member-te chuan June 29, 2024 (Inrinni) khan Suaka Cricket Stadium, Sihhmuia 1st Veteran Cricket Tournament final match an en bakah, cricket stadium tihchangtlun hna thawh mekte an en.
Cricket final match khelh zawhah CAM hruaitute chuan an president Lalrochhuanga hoin MJA member-te hi Suaka Cricket Stadium tihchangtlun hna thawh mek an fanpui a; an hmalakna kal mekte an hrilhfiah.
Suaka Cricket Stadium-ah hian CAM chuan project pahnih an kalpui mek a. Pakhat chu CAM-in anmahnia project an siam cheng vbc. 31.5 senna tur a ni a, chhawng 4-a sak tur a ni. Hetah hian inkhel entute thutna tur gallery leh mikhual thlenna tur te, player-te inthlakna tur te, eirawngbawlna leh chaw eina tur (kitchen & dining hall) te, physiotherapy room te, media room, commentator room, referee room, VIP room, office, multipurpose room, indoor game room leh thil dang eng emaw zat a awm dawn a ni.
Cheng vbc. 18 senna tur project chu BCCI project a ni thung a. Indoor cricket pitch, swimming pool, gym leh thil dang eng emaw zat a awm dawn. Heng project pahnihte hi kum 2025 chhungin an zawh hman tur thu CAM hruaitute chuan an sawi.
CAM hruaitute chuan project pahnihte chu an zawh hunah chuan international match pawh an thleng thei dawn tih sawiin, “Tunah kan ground hi chu international level a ni a, ground bik hi chu international match khelhna tlak a ni. Mahse, player-te inthlakna leh mamawh hrang hrangte kan la neih that loh avangin kan la thleng thei lo a, tuna kan project neih pahnih hi kan zawh hunah chuan international match kan thleng thei ang a. Ranji Trophy velah pawh home match khelh nan hman theih a ni tawh ang,” an ti.
CAM President chuan, CAM chu kum 2018-ah BCCI-ah direct-in an lut tih sawiin, “Kum 2018 atanga kumin thlengin CAM hian Mizoram budget pawn atangin cheng vbc. 231.9 kan hai luh tawh a, Mizoram sorkarah GST cheng vbc. 10.2 kan chhung lut tawh. Play-te hnenah cheng vbc. 158 kan pe chhuak tawh bawk. CAM hian Mizoram economy atan kan thawh hlawk ve hlein kan hria a. Chuvangin, kan sorkar hian cricket tan eng nge kan tih ve theih tiin min rawn zawt ve turah kan ngai thin. Cricket hi eizawnna a ni mai lo a, hausakna a ni, an ti a, hei hi a takin kan tawng chho mek a ni,” a ti.
CAM hruaitute chuan, Suaka Cricket Stadium awmna chu Aizawl atanga a hlat tham avangin mi tam tak tan pan a harsa a, chuvang chuan Aizawlah cricket khelhna tur hmun an mamawh hle tih an sawi a, “Aizawlah cricket centre din kan duh em em a, hei hi cricket hmasawn zelna atan a pawimawh tak zet. Chutih laiin ram man BCCI atangin kan dawng thei lo. He lai hmun hi chu pan a harsa, hmeichhe tan, naupangte tan pan a harsa bawk si a,” an ti a. Cricket chu eizawn a tling a ni mai lo a, hausak theihna a nih avangin Mizo naupang leh thalaite’n cricket khel sup sup se an duh thu an sawi.
1st Veteran Cricket Tournament final-ah hian Ditea’s Team leh Assam Rifles team an intum a, Ditea’s Team hian run 31-a Assam Rifles hnehin an champion a ni.