- Lallunghnema, Charity Lodge
Kumin 2024 chu Pathian zarah kan hotute duhsaknain ka consumer nasa hle mai. Thla bi hlah lovin Awareness Programme hotute nen hmun hrang hrangah kan hmang thei a. Tun hnai lawk, June 23 khan ka thawhpui thian thenkhat, Pu Lalsangpuia , Vice Chairman, CFCE,Dr Maria Asst. Secy, CFCE- te nen DDK-ah Live Discussion kan nei a. Thlirtu mipuiin an lo chhawr tangkai ngei ka beisei.
Tun hnaia ka message dawn maksak tak hi ka han zep tel lawk teh ang.
“He mite hian kan chawhmeh man mi an pe duh lo a, an tlanbo zel a, kan phone lahin phone call an chhang duh lo a, message thawn lahin an ‘seen’ duh bawk si lo. Ka pu, khawngaihin min pui thei ang em le? Mi an bum kual reng bawk si a, Keini’n sum neih kan nei bawk si lo a, a dang lak leh pawh tum ila, kan la thei tawh lo ani. Rs 3900 min pe duh miah lo tawp, an lâk atangin chhuanlam hrang hrang a dap a, ka buai takzet a ni, ka pu”- Hming thup
Hetiang neuh neuh message hi ka dawng!
Mangan thlâk a tling! Kristian ramah hian inbum hi kan chaw tui ber a la ni zui zel zawng a nih hi!
Tunah chuan Serchhip lama ka thianpa duhawm, mipui hmangaihtu thu leh hla hi i lo ngaithla teh ang.
Electric bill i chawi dik leh dik loh chhut rawh le.
- Laldinpuia, Secy Serchhip District Consumer Assn.
Electric bill sang chungchangah hian tunlai hian sawi a tam hle mai a, kan bill san avangin tam tak kan phun kan phun a, a thawktute kan dem a, thenkhat phei chuan thil hre chiang mang lovin, “sawrkarin SEDP tuak nan a hmang a niang” te an han ti leh ngawt thin a. Rin thua zeldin chiam emaw, hre chiang mang hlei lova tu emaw dem vak ai chuan thil nih phung kan hriat hmasak phawt hi consumer tena kan tih tur a ni. Chuvang chuan kan electric bill sang hi a dik reng em? tihsual a awm em? tih awlsam taka chhut dan lo tarlang dawn ila.
Tuna Electric bill tariff kan hman mek hi 2022-2023 tariff a ni a, hetiang hi mipui nawlpui ina kan hman Domestic connection bika a rate awmdan chu a ni –
1) Unit 0-100 inkar kan hman man hi Unit khat zelah Rs 4.90/- a ni.
2) Unit 101-200 inkar kan hman man hi Unit khat zelah Rs 7.10/- a ni.
3) Unit 200 leh a chunglam zawng hman man hi Unit khat zelah Rs 8.20/- a ni.
4) Connection tinah contracted load hi Rs 50 per kW zel chawi tur a ni. Kan Electric bill ah khan a veilamah contracted bill a awm a, khata inziak leh Rs 50/- puntir tur a ni.
5) Meter box hi Dept atanga kan hawh anih chuan Rs 20/- zel thla tin kan chawi a ngai a, keimahni sum senga kan lei anih erawh chuan rental chawi a ngai lo thung.
Khing tarlan rate hmang khian awlsam takin kan Electric bill chawi zat hi a hriat theih a ni.
Kan bill chawi zat tur i han chhut chhin dawn teh ang:
Kan electric bill a contracted load tih hnuaiah khan reading hrang hrang a awm a, present reading atanga previous reading kha paih tur a ni. Khami paih chhuaka kha a hnuaia slab hrang hrang hmang khan bill chhût a ni ta a ni.
- Entirna 1-na:
Contracted load kha 0.50 kw ni ta se, unit consumed kha 27 ni ta se. I bill chawi zat tur chhut dan chu hetiang hi a ni ang – Contracted load 0.5 leh fixed charge Rs 50 i puntir ang a, i unit chawi zat 27 leh unit 1 hman man Rs 4.90 i puntir bawk ang. Chumi chhuak pahnih chu i bill chawi zat tur chu tihna a ni. (0.5xRs50=Rs25, 27xRs4.90=Rs132.3, Rs25+Rs132.3=Rs157.3 hei hi i bill chawi zat tur a ni.
- Entirna 2-na:
Contracted load ah 2 ni ta se, Unit hman(present reading atanga previous reading paih) kha 169 ni ta se hei hi kan bill chawi zat tur a ni ang-
Fixed charge 2 kw x Rs 50 = Rs 100
Unit hman zawng zawng kha unit 169 a ni a
a) Unit 100 chin kha Rs 4.90 in kan puntir ang (100 x Rs 4.90 = Rs 490)
b) Unit 100 bak unit 69 la awm a kha Rs 7.10 in kan puntir ang(69 x Rs 7.10 = Rs 489.90
TOTAL (Rs 100+Rs 490+Rs 489.90= Rs 1097.9 hi kan bill chawi tur a ni ang.)
- Entirna 3-na:
Contracted load ah 1 ni ta se, Unit hman(present reading atanga previous reading paih) kha 301 ni ta se hei hi kan bill chawi zat tur a ni ang-
Fixed charge 1 kw x Rs 50 = Rs 50
Unit hman zawng zawng kha unit 301 a ni a
(a) Unit 100 chin kha Rs 4.90 in kan puntir ang (100 x Rs 4.90 = Rs 490)
(b) Unit 100 dang kha Rs 7.10 in kan puntir ang(100 x Rs 7.10 = Rs 710)
(c) Unit 101 a la chuang a, khami kha a slab tawp ber Rs 8.20 nen kan puntir leh ang (101 x Rs8.20= 828.2)
TOTAL (Rs 50+Rs 490+Rs 710+Rs828.2= Rs 2078.2 hi kan bill chawi tur a ni ang.
‘Tiang hian awlsam takin kan bill chawi hi a dik em, kan eng chhit ral leh kan bill chawi hi a inmil em? tih te awlsam takin mipui ten kan chhut ve thei a ni. Khitianga kan chhut hnua diklo a awm emaw, unit a kal tam uchuak lutuk anih chuan Department hotute hnenah arang lama complaint thin tur a ni. Tin complaint dawn reng rengin bill pek hmâ a complaint tur a ni.
- Source:
1) MIPUI CHANPUAL
2) P & ED Traiff Order for FY 2022-23.