Thawhtanni khan Remna Ni vawi 38-na chu Kolasib Hnam Runah hman a ni a, remna ni June ni 30 chu Pathian ni anih avangin nimin khan a hman hun sawn a ni.
He huna khuallian MNF Senior Vice President, Dr. R Lalthangliana chuan kumtin MNF chuan Remna Ni kan hmang thin a, kan sorkar lai chuan sorkar angin kumtin kan hmang thin a ti. MZP General Headquarters-ten tun hnaiah District thenkhatah remna ni hmanna hun an hmang ta chu lawmawm a tih thu a sawi a, NGO dangte pawhin an entawn atan he ni pawimawh bik hi hmang ve thei se a duhthu a sawi bawk.
Remna awmzia hriat chian a pawimawh zia thusawiin, ram chu eng ang pawhin hausa mahse; ram a him loh chuan awmzia a nei lo. Indona ram reng reng chu ropuiin hausa hle mahse; an hausakna pawh kar hnih khatah a kangral mai a. Pathianin a fapa Isua Krista kan tana a rawn tirhna chhan pawh khawvelah remna leh muanna a awm theih nan a ni a, remna leh muanna chu a man a to a, keini pawhin remna hlutzia hriain kan vawnghim zel tur a ni, a ti.
Kum 1961, March ni 1-ah MNF chuan awpbehna ata tal chhuak turin independence a puang a, kum 1966 atangin kum 20 chhung zet ram a buai ta a. Nasa taka kan tawrh hnuah, Pathian chuan June ni 30, 1986-ah remna hlu tak min pe ta a. Chu chuan UT atangin State min nih tir nghal a. Remnaah khan MOU-ah Article 371/G inhungbikna tha tak min pe a, remna in a kentel High court ropui tak pawh a takin a lolang chhuak tawh a. Mizoram University pawh remna in a kentel a ni a, India ramah a ti thate zingah kan lang pha ta hial a, a ropui takzet a ni. Remna kha awm ta lo se, hengte hi Mizoramin kan la nei kher lo ang. Remna hi thenkhatin sawi nep thin mahse, khawvel awm chhung chuan a hlu ber zel dawn a ni, a ti.
Thangthar tam takten rambuai lai an hre tawh lo a, remna hlutzia an hre pha tawh lo tiin, kan ram leh hnam humhim zel nan hnam thinlung tak tak Mizo Nationalism chu kan vawnnun reng a tul thu a sawi bawk.
MNF Senior Vice President chuan nimina inthlan result puan tak LADC MDC by-election Chanmari-ah C Lalsawmzuala, Treasurer Lawngtlai District Headquaters MNF chuan vote 285-in a khingpui ZPM candidate hneha thlantlin a ni chu lawmawm a tih thu a sawi bawk.
He hunah hian khualzahawm K.Lalrinliana Ex-Minister, Adviser MNF General Headquarters, Zodinpuia General Secretary, MNF General Headquarters bakah Ex-MNA Association Kolasib-ten thu an sawi bawk.
He hun hi Lalzawmmawia, President MNF Kolasib East Block chuan a kaihruai a, R.Lalbiakkunga Adviser, MNF Kolasib East Block chuan hunserh a hmang a ni.