Nimin khan Convention Centre, Lunglei ah LMC Award 2024 for Best/Cleanest Ward kick off na hun hman a ni a, K Sapdanga, Home Minister chu Khuallian niin C Lalsawivunga, Art & Culture Minister chu Khual zahawm a ni.
Thu sawiin Minister K Sapdanga chuan,”Vawiin ah Lunglei khawpui tana hmasawnna rahbi thar pawimawh tak mai hun kan hmang thei hi a lawmawm hle in ka hria a. Lunglei khawpui hi kawng hrang hrangah Mizoram tan hmahruaitu leh hnarkaitu pawimawh tak a ni thin a, politics ah pawh a mei chhi tan tu a ni. LMC inthlanah, kan hriat angin hnehna sang tak min pe a, Mizoram politics chanchinah chuan thil chhinchhiah tlak tak a ni,” a ti.
“Hetiang hun ṭha leh hmachhawp ropui tak mai faina kawnga inelna kum khat daih buatsaih a ni tur hi faina kawngah Mizoram tan meichher in rawn chhi leh dawn niin ka hria a, a phurawm hle a ni. Mizoramah sawrkar thar a piang ve hlawl a, hunpui boruak leh ram pum inthlan boruakin min nangching lehnghal a, hmalakna tak tak a la awm hman meuh lo a ni. Tunah chuan LMC lam pawhin ruahmannate siamin hna an thawk tan thei dawn ta a, LMC hi Lunglei tan mai ni lovin Mizoram pum tan entawn tlak leh bultantu in nih kan beisei a, Mizoram leh Lunglei mipui beisei ang ngeiin hna an thawh ngei pawh kan beisei a ni. Ram leh hnam hmasawnna tur a nih chuan party bil sawi lo va, theihtawp chhuaha thawk ho turin kan insawm a ni,” a ti bawk.
C Lalsawivunga pawhin thusawiin,”Lunglei khawpui hmasawnna hi state sawrkar hian a ngai pawimawh a, LMC pawh hian a vei tak meuh tih kan hria a ni. Hmasawnna hna kan thawhnaah hian inpumkhatna a pawimawh a, mahni hmazawnah theuhah theihtawp chhuah turin kan ingen a ni. LMC hian hma a sawn chho zel dawn a, Lunglei khawpui hmasawnna atan hian LMC chauh a pawimawh lo va, mipui pawh kan pawimawh bawk a ni,” a ti. “Dikna hi ngaina ila, taihmakna leh thawhrimna nen kan ram tan i thawk zel ang u, Lunglei khawpui hian faina chungchangah Zoram khawvel a chhem alh ngei kan beisei tlat a ni” a ti bawk.
He hun hi K Lalrinawma, Vice Chairman Lunglei Municipal Council in a kaihruaiin Rev H Lallianzara, Administrative Secretary, PCI in hunserh a hmang a, Lalramliana (Papuia) MLA Lunglei South leh T Lalhlimpuia, MLA Lunglei West te pawhin thusawina hun an hmang bawk.