- Ruata
Mahindra chuan an offroad SUV lar Thar kawngka 5 (a hnung, tailgate chhiar tel thin a ni) awm tur Thar 5-door chu siamchhuah hna an tan a. Media report hrang hrang chuan Mahindra Chakan plant-ah an siamchhuak mup mup tan tih an tarlang a ni.
Mahindra hian a siamchhuah hna chak lehzualin an kalpui tih tarlan a ni bawk a. Hei hi lei tum an tam vang a nih hmel a ni. Mahindra hian a tir lamah chuan thla khat chhungin 2500 siamchhuah hman turin an ruahman phawt a, heti a nih chuan kum 1 ah chuan 30,000 bawr an siamchhuak hman dawn tihna a ni a. Tun dinhmunah chuan thla khata 5000 atanga 6000 siamchhuak hman tur leh kum khata 70,000 dawn siamchhuak hman tur khawpin an tang mek thung a ni.
Kan hriat angin Mahindra Thar hi 3-door, body tawi hretin a chhuak mek a ni a. Tuna lo chhuak thar tur hi chu nasa takin a tangkaina a tam zawk tawh dawn a. Nitina mihring phurhkual na atana tangkai leh hman nuam tur leh, offroad adventure lamah pawh tangkai leh tha tak tho siin a pian leh a nihphung hi a rawn awm tawh dawn a ni a. A hma ai chuan to hret dawn mahse leitu an tam viau a beiseiawm thung a ni.
A hma aiin a sei dawn a, heti anih chuan a chhung a zau nuam tawh ang a, mihring a chuan tam theih dawn a. Hei mai bakah hian a hnunga bungraw dahnaah pawh a hma aia tam daih bungrua a leng tawh dawn a ni.
Mahindra Thar hi a man a to dawn tho na a, a man tlawm lam pawh a awm dawn tho a. Chi hrang duhthlan tur a awm nual hmel a ni. A khawlah pawh duhthlan a awm leh neuh neuh dawn a. Tuna Thar-a kan hmuh ang tho a hnung ke phih kal (Rear Wheel Drive) 1.5 litre diesel khawl atanga 2.2 litre diesel khawl, 4 wheel drive system nei tel thlengin a awm dawn a. 2.0 litre turbo petrol pawh awm tura beisei a ni a, khawpui veivak nasa ten an ngainat, automatic gearbox lam pawh a awm dawn bawk a ni.
A hming turah hian Mahindra Thar 5-door hi Thar Armada tih hming a pu maithei tih te a awm a. Market lamah anmahni SUV dang sales hi a rawn vawchhe thei mai ang em tih tur khawpin nghakhleltu an tam hle tih media report thenkhat chuan an tarlang a. Engpawhnise, he SUV thar tur chungchanga hriat tur kimchang leh, market lama a dinhmun tur chu kan la hre chho zel ang a. An tlangzarh hun tur pawh company lam la ngaihchan zel a ngai rih dawn a ni.