Mizoram Congress hruaitute leh Bawm Students’ Association hruaitute chu MPCC President’s chamber-ah nimin khan an inkawm a, Mizoram Pradesh Congress Committee Elected OB ten an lo dawngsawng.
He hunah hian MPCC President Lal Thanzara chuan thu sawi in “Mizoram Pradesh Congress chuan Zohnahthlak unaute harsatna tawh mek hi kan tawrhpui takzet a, an tan hian kan theih tawkin hma kan la dawn a ni. Mizoram sorkar pawhin kan unaute dinhmun hi enfiah a, an harsatna tawh mek hi sutkian pui turin kan beisei a, sorkar laipui dawr se la, BSF ten harsatna an siam mek hi ti tawp turin hma la rawh se.” a ti.
Bawm Zirlai te hian Bangladesh lama kan Zohnahthlak unaute mahni sahimna zawnga Mizoram rawn pante chu Damdep 2 ah BSF in an lo dang a, an dinhmun a harsa hle a ni tih thu MPCC President hnenah hian an thlen a, tanpui turin an ngen a ni. Bawm zirlaite hian an harsatna tawh hrang hrangte an thlen bawk a. MPCC President hian an hnenah hian tanpuina sum eng emaw zat a pe bawk.
Tunlai chhiatna thleng chungchangah chhiatna tawkte a tawrhpui thu sawi in, “Tunlaiin ruah nasa takin a sur mek a, leimin avanga harsatna tawkte leh nunna chante kan tawrhpui takzet a. Zoram hmun tina party miten tanpui ngaite tanpui turin kan ngen tak zet che u a ni,” a ti.