Nimin khan Vanapa Hall-ah Student Self Support Union (SSU) General Headquarter buatsaihin INTODELH BEIHPUI THLAK LEH ZIRLAITE KALNA AWM KAWNG KAWHHMUHNA HUN LEH LEHKHABU TLANGZARH hun hman a ni a, C. Lalsawivunga, Minister, AH&Veterinary, Art & Culture etc in khuallian niin a hmanpui.
C. Lalsawivunga chuan,”Zirlaite tana pawl pawimawh tak mai SSU a ding hi a lawmawm hle a, he pawl thiltum pawh hi a ropui a ni. He pawl hruaitute inpekna leh thawhrimna zarah zirlaiten tumruhna hmanga hlawhtlinna an chan chhoh zel pawh ka beisei a ni. Kan mi hlawhtling hmasate kha an tum a ruhin mahni a intodelh chunga lehkha zir an lo zel a, an tumruhnate khan an tum ram a hruai thleng a, mi taima leh tumruh hi Pathian pawhin mal a sawm thin a ni,” a ti a. “Kan ramah hmasawnna hmuh tur tam tak a awm a, hmasawnna tam tak a awm lai hian ei leh bar leh kan silh leh fen thawh chhuah kawngah kan lo intodelh tawk lo hle mai a, hmabak tam tak kan la nei a ni. Kan ram hruaitute bul lo tan tawh chhunzawm zel hi thangtharte mawhphurhna a ni,” a ti bawk.
Sawivunga chuan, “Vawiinah intodelh beihpuithlak chungchang kan zir ho theite hi a lawmawm hlein ka hria a kan ram tana ro tling zir chhuak ngei turin kan inchah duh a ni. Kan ram leh hnam tan leh thang thar lo awm zel turte tan ngaihtuahna fim tak kan hman a pawimawh a, mizo kutchhuak thil chi hrang hrang hmuh turte a awm ve ta nual a, hengte hi kan ngaihsan a hun tawh hle a ni. Kan thlai tharte, kan ran vulhte leh thil dangte hi a lo to deuh a nih pawhin ngaihsan nachang kan hriat a kan lei zel hi a pawimawh tak zet a ni,”a ti a. “Ngaihtuahna fim tak kan hman a ngai a, thawh hreh kan neih lohte pawh a ngai a ni. Sawrkar in hand holding policy hnuaiah thalaite tan entrepreneurship a ngai pawimaah a, chumi hnuaiah chuan mahni kutkawiha kan intodelh theih nan hma lak mek zel a ni,” a ti bawk.
AH & Veterinary Minister chuan, “Thalaiten kan tuina lam kan hriat a pawimawh a, tum mumal tak neiin chumi chu a taka chantira a hlawhtlin theih nan rim taka thawh a ngai a ni. Hmasawnna kawng dika kan ramin ke a pen theih nan leh chumi atan chuan thiamna a ngai a, pass ringawt hi a tawk lo a, kan zirlaite kan thiam bel a pawimawh em em a, thiamna bik kan neih a ngai a ni.” a ti a.
“Zirnaah tan lak kan ngai hle a, Mizo zingah officer tha tak tak eng emawzat kan nei a, hengte hi thenkhat chu hnam dang thuhnuaiah an awm a, hei hi kan tan lakna hmasa tur a ni. Mi hlawhtling ni tur chuan Pathian tih a pawimawh a, a malsawm tlak leh duhsak tlakin kan nung tur a ni. Nu leh pa thuawihin chawimawi ila, chu chu lei malsawmna dawnna pawh a ni a. Kan Pathian thu min zirtir dan pawh a ni,” a ti bawk.
He hun hi hun hniha hman a ni a, hun khatna hi Lallawmzuali’n kaihruaiin hun hnihna hi Benjamin J Malsawmdawnga’n a kaihruai a, mi thiam hrang hrang hnen atangin thusawi an ngaihthla bawk.