Vairengte, Bilkhawthlir leh Hachhek bial Kuhva Chingtute chuan nimin khan Joint Committee an nei a, hetiang hian thuchhuah an siam.
Kuhva Chingtu te leh Thuneitute te inremna bawhchhiat a ni, tiin. Myanmar Kuhva ip 9635 man tawh ni a sawi man a ni lo leh Kudam aṭanga a bo deuh vek hi kan hrethiam lo, an ti a.
Vairengte leh a chhehvela Foreign Kuhva Smuggling kudam aṭangin kuhva ip 9635 awm mek chungchang ah Dt.1.7.2024 khan Kolasib DC Conference Hall-ah, Kolasib DC Pu John LT Sanga kaihhruainain sawiho a ni a. He meeting-ah hian Kolasib SP Pu David Lalthangliana leh DC Pu John LT Sanga, SDPO Vairengte, SDO (C) Vairengte leh Vairengte, Bilkhawthlir, Hachhek Bial Kuhva Chingtu Joint Committee aiawhte an tel, tia sawiin.
Heng Foreign Kuhva Smuggling godown ami te hi chesawn tawh lo tur leh Dan anga hmalak tur a nih thu Kolasib DC leh SP chuan sawiin, hnatlang neih ngai lo a thenfai thuai an tum thu leh hnatlang nei rih lo turin kuhva chingtute min ngen a. July 5, 2024 thleng lo nghak tura min ngenna chu zahawm tiin ni 5 hnu lama hmalakna a awmloh chuan resolution kan pass tawh angin Kuhva Chingtute chuan kalpui kan tum, an ti a.
Beiseina sang tak nen sorkar hmalakna kan nghah mek laiin, Dt 2.7.2024-a Vairengte SDPO/OC leh Kuhva chingtu aiawhten kuhva ro godown-a chhekkhawl sa a kim leh kim loh enfiah a ni a, Kuhva ro ip 5741 lai mai chu lakchhuah a ni tih hriat a ni, tunah hian ip 3894 chiah a awm tawh tih hmuh chhuah a ni. Hetianga kan inremna bawhchhe zawnga Smugglers-te an che mai hi kan hrethiam theilo a, Heng kan inremna te pawh hi Foreign Kuhva humhim duh avanga ruahhmanna siamte pawh a ang kan ti a. Keini Kuhva chingtu farmers-te min zah loh zia leh min hmuhsit zia tilangtu ah kan ngai. Kan inremna bawhchhe tute leh an thurualpuite hi sorkar-in an chungah action ala ngam lo a nih chuan keini Kuhva Chingtute hian kan ramah dikna chanvo nei ve lo ang hialah kan inngaih a lo ngai dawn ta a ni, an ti bawk a.
Vairengte, Bilkhawthlir, Hachhek Kuhva Chingtu Joint Committee chuan, Dt.6.6.2024 khan Joint Resolution siamin, ‘Mizoram chhunga Dan lo a kuhva lakluh stock-na Godown te hi June 30, 2024 ral hmaa titawp vek turin Mizoram sorkar kan ngen a. Sorkar-in Kuhva ro stock-te mana a titawp lo anih chuan Kuhva chingtuten aṭul angin hnatlang a ko ang.’ tih kan lo pass tawh a ni, tiin an thuchhuah intawm siamah chuan an tarlang.