- K. Hmingthankaia
Heng thu ho te te hi kei hian ka lo buaiphah ve em ema, chhan tlaka inngaih chuan min han hrilhfiah te u.
AMC- E-EM-SI ti-a kan lo lam thiam ve em em tawhte, ATC- E-TI-SI ti-a nal taka kan lo sawi ve zaih zaih thinte chu tunlai hian mithiam pui pui niawm takte hian, a hawrawp bul hi Mizo tawnga A AW B ami ‘A’ ang hian an lam ta tlat mai a. Aizawl Municipal Corporation chu A-EM-SI an ti a. Aizawl Theological College pawh A-TI-SI an ti ta fo mai si a, engtia lam tur ber nge ni ta le?
A hawrawp bul ber hi Mizo tawnga A AW B ami anga lam a ni tlat alawm, kan ti a nih chuan, a dawtleh thute hi Mizo tawng veka dah awm tak, te ka lo ti ve a. Enge E-EM-SI, E-TI-SI ti-a sawi chu a pawina awm le te ka lo ti ve deuh a ni. Hnamdang bula sawi dawnin engtia sawi tur nge? Hnamdangin an chhiar dawnin,’E’ ti suh, ‘A’ ti rawh tih tur em ni? Kan ti Mizo dawn a nih rau rau chuan- Aizawl Khawpui Relbawltu=A-KE-AR (AKR). Aizawl Pathianthu Zirna= A-PI-ZET (APZ) te ti ta ila. India ram State lian ber leh mihring cheng tamna ber Utter Pradesh khu a lamtawi chuan, IU-PI(UP) an ti a, a lampumin Iutar Pradesh an ti leh mang si lova, te ka lo ti vel mai maia.
Tin, tunhma deuh khan, ti ila, tunhnai-ah pawh mi pakhatin a sawi ka hria, Italian Football league sang ber, Serie ‘A’, English alphabet ami anga keinin Serie ‘E’ kan lo tih that hle hle kha, mi thenkhatin Mizo A Aw B ami angin, Serie’A’- a a A tih tur te an ti leh si a. Italian ho khuan Mizo A AW B ami kan lam ang hian he thumal ‘A’ hi an lo lam ve emaw mi le? Chuti anih chuan, an league sang ber dawttu, Serie ‘B’ te khu, Serie ‘AW’ te tih leh mai awm tak ti te-in ka lo buai ve em em a. Ka buaina hi a tam lutuka, a hnuaia pakhat tal hi engtia lam nge dik ber tih min han hrilh teh u.
Khawvel huap pawhin thu lam dan tlanglawn deuh hi chu a awm lo maw?
AAM AADMI PARTY=AAP=E-E-PI= EM EDMI PARTY. USA= IU-ES-E= United State of Emerica. YMA= UAI-EM-E= Young Mizo Essociation.