ZPM party chuan nimin khan thuchhuah siamin, Chief Minister Lalduhoma kaihhruai Kalphung thar mipui sorkar chuan mipuiin thuneihna an pek tirh phat atangin huaisen takin zoram hmasawn nan hma a la mek zel a, Assembly Budget Session leh MP election 2024 ten hnathawhna hun tam tak la hek mahse, chhun leh zan zawmin ministers leh MLA ten hna an thawk mek a, kalphunghluia hun rei tak mizoram lo hruai chul tawhtute mit a kham hle niin a lang, an ti.
Hetih lai hian Sorkar thar chuan huaisen takin hma a la zela, thomitchhaih ang maiin eptu lam partyte chuan sorkar thar chu thu tlling lo leh belhchian dawl lo hmangin chhaihbuai an tum nasa hle tih hi mipui nawlpui hmuh dan a ni. Tun hnaiah sorkar thar chuan huaisen takin Buhfai man a siam tha a, hengte hi thenkhat chuan mipuite tawrhna thlen tur angin thu an thehdarh a, hei hi a pawi hle a ni. Mipuite pawhin Supply Minister thu chhuak kha ngun taka kan ngaihven a tul a, mipuite that tlanna tur ngaihtuahin sorkarin ngaihtuahna a seng a ni tih kan hriat a tul. chutiang bawkin tuialhthei man chungchangahte pawh kutdawh rilru pu lova kan ram hmakhua thlir chung zela mipuiten sorkar hmalakna kan thlawp zel hi a pawimawh hle a ni, an ti a.
CBI thuneihna pek chungchangah pawh tunhnai khan youtuber pakhat chuan, thu chiang hre lo leh India ram puma hman tur Criminal law thar – Bhraratya Nyaya Sanhita-2023 zir chianna nei lovin Mizoram Sorkarin CBI Kohluh sut leh ta anga mipui hmuh theihin video a rawn siam leh ta ringawt mai a, Mizoram Sorkar Vigilance Department chuan thu dik hmangin chiang takin an rawn hrilhfiah ta nghe nghe a ni, an ti bawk.
ZPM thuchhuah chuan, tunhnaia Casual Teacher lak chungchangah Mizoram Sorkar chu fak a hlawh hle a, chutih rualin posting chungchangah siamrem ngai a awm avangin tunah hian siam rem leh mek a ni a, hemi chhung lek pawh hian thenkhat chuan School Education Department chirh thehna tur an lo zawng leh hman a ni. Kan dawhthei lo tlang nge Sorkar lai chhaihbuai kan chak tih pawh hi hriathiam a har khawp mai. Casual teacher tura lak te hi sorkar hian a duhna leh mamawhna hmun apianga dah tura lak an ni a, he mi hresa leh huam hian hna zawnglaite pawhin hna an dil a ni.
Councillor, Corporators leh Board Chairman te lawman siamthat chungchangah pawh hi ngun taka kan ngaihtuah a tul, hna tak tak thawk tura kan beisei chuan an mamawh zualpui phuhru tur tal lawman kan siam sak hi thil tih makmawh a ni. Heng lawmman ennawn sakte hi mi tam an ni lova, mipui tana hna chakzawka an thawh theihna tura an tha tihchakna a ni a, mipui tan vek a ni tih kan hriatthiam a tul hle a ni, an ti a.
Mizoramah Sorkar thar kan nei a, mipuiten beiseina sang tak nen an thlir meka, chutianga hna an thawh mek lai chuan eptu lam chuan kil tin atangin beihna leh sawiselna tur an lo zawng reng bawka, hei hi sorkar khalhngil tumna lam aiin politics a mipui rilru kawih her tumna mai niin a lang. Heng zqwng zawngah hian Kalphung thar mipui Sorkar chu huai takin sorkar hmasa tih ngam lohte tiin kan ram tan a kal zel dawna, Mipuite pawhin eptu party lam game hi kan hriatthiam angai hle, an thu leh hla ai chuan Sorkar thu leh hla ngaihchan nachang kan hriat a tul hle a ni, an thuchhuahah chuan an ti bawk.