Congress Party chuan nimin khan Congress Bhavan-ah ‘Friday Political Session’ an hmang a. He hunah hian MPCC President Lal Thanzara chuan thu sawi in, “Lalpa rawngbawl chunga politics hi kan kalpui anih chuan kan hlawhtling ang.
“ZPM hian an sorkar hmaa an tih ve loh reng reng tur an sawi te chu, Contractor in a thawk tawh anga, Restricted Tender kan ti ve lovang, VIP Culture kan tibo ang tih te, kuhva ro dan lova tawlh thla khat chhungin kan tibo ang ti ten an sawi a, pawisate pawh kan puk ve lovang an ti a, sawi loh ang hlirin an tia ni. Chanchinbu ah te kan hmuh ang khan khan kuhvaro tawlhruk Bag 9000 lai mai Vairengte leh a chhevela awm, thuneitute nena lasawn lo tura inremna awm chu a rukin bag 5000 chuang lakbo a ni a. He thil hi thuneitute hriatpui lo chuan chuan a lakbo theih loh ang tih a rinawm.
“Austerity measures an lak dan tur te an sawi a, MLA Fund te an han tipung a, Board Chairman hlawh te an ti pung a, Councillor hlawh te an ti pung a, Advisor te an ti pung a, anmahni enkawl nan sum tamtak an hmang mek a ni.
“MZP in Remna ni lawmna an huaihawt tum khan, Kan Chief Minister hian thudik tawklo a sawi a. Kan Chief Minister hi thudik leh dik lo hrechiang tu a ni chunga khatianga a sawi duh kha a hah awm mange aw ka ti a. MP atanga Anti Defection law hmanga ban hmasak ber emaw ka lo tia, Remna leh muanna avanga bang kha a ni ni reng mai a! Khami ni khan thil dik ziktluak lo a sawi duh kha a lainatawm ka ti. An party ah hian mithiam tak tak te, thil hre thuk tak takt e an awm ve anga, chungte chuan engtin nge an ngaih ang le?
He sawrkar hian lehkhathiam tak tak te, mithiam tak tak Adviser, Celeb leh Consultant te an nei a, chuti chunga an kal fuh thei lo hi BJP hluihlawn thil an lo la em ni ang tih ka ngaihtuah a, hetiang zela an kal chuan ‘ennawm mak tak’ kan la hmu in ka ring a ni.
Kan hriat theuh angin kan thenawm unaute Bangladesh leh Burma border ah te buaina a awm mek a. Burma nena kan insumdawn tawnna Border Trade hi Assam Riffles ten Gate an kalh tlat mai a. Kan Home Minister in Central Sawrkar thu lovin Assam Riffles ten an lo khar a, kan hawng leh tawh tih an sawi pawh thu diklo ani a, Gate te zawk chauh an hawn avangin mi tamtakin harsatna tam tak an tawk mek a ni a, Border Trade hi hawn leh anih vat theih nan hma la turin ka duh bawk a ni. Kan Unau Bangladesh atanga rawn raltlan nunau te chu BSF ten Bangladesh lamah an lo hnawt kir leh thin te hi kan State sawrkar hian BSF te hnenah kan unau raltlante dangkir tawh lo tura thu pe turin ka duh bawk a ni.
“Kan hmuh leh kan hriat ang hian kan enchhin sawrkarah chian mipui an beidawng tan mek a, anmahni thlaktu tur mipui in arbo an zawng mek a ni. MNF lam an han en a, mahse an hotupa ber en hian beisei an nei thei tawh lo. Congress min han thlir a a, an ni hi an thutiama ding thin, remna leh muanna atan lalthuthleng an kian a, NLUP ah tanpuina Rangva kan sem ang, kuthnahawktute dawm kan nan hma kan la ang ti a lo ti hlawhtling thin tawh tute party kan nihna angin min enthla mek a ni. Vawiin ni ah hian inlungrual ila, thawk ho ila, mipui in kan lakah beiseina an nei ni. Lalpa Pathian tih man chu sum te, chawimawina te a ni tih hria ila, tho ila, i dingchhuak leh ang u.” a ti.
He Friday Political Session hi Zosangliana, Secretary, MPCC chuan a kaihruai a, C. Ngunlianchunga, Vice President, MPCC leh C. Vanlalruata, Vice President, ADCC chuan report a pe bawk a, Rev Liandawla chuan thusawina hun a nei bawk a ni.