BJP Mizoram chuan nimin khan karthar inhlanna leh Political Session hun an party office ah an nei a, Lalbiakkimi, State Mahila Morcha President-in inkhawm kaihruaiin, VL Awia, State Secretary-in hunserh a hmang bawk.
He huna thusawitu Vanlalhmuaka, State President chuan, “Mizoram ah hian BJP ah mi nawlpuiin beiseina sang tak an nei a, nimahsela ralkhat aṭanga min lo thlir ṭhin chauh avangin an beiseina ang Development Mizoram ah kan la hmu thei lo a ni,” a ti.
Hmuaka chuan, “Mizoram ah Development beisei mipui tam tak an awm a, kan beisei Development erawh kan duh lo tih kan Vote kan thlak dan ah a lang chiang a, vawiinah chuan kalphung thar hnuaiah beiseina sang tak nei chungin, beiseina erawh kan tisang thei tawhlo tih a chiang hle in a lang tawh a, kan State Sorkar hian thil ṭha tih an duh tih a chiang a, nimahsela thil ṭha tih theihna erawh an neilo tih hi mipui hian kan chiang hle in a lang a ni. Sorkar hmasa anga Kum 5 chhunga thiam taka mipui rilru sukthlek mila chhuanlam siam a hun an hman leh mai pawh a hlauhawm hle a ni,” a ti.
Hmuaka chuan, “BJP Manifesto, 2023 MLA Election-a mi leh 2024 MP Election-a mi te kha tih theih vek a ni a, nimahsela vawiin ah erawh Mizoram mamawh êm êm kan Manifesto te kha tih theih a nilo a ni. A chhan chu mipuite’n min rinloh vang a ni. Pathian Malsawmna dawng tur pawh hian amah a innghat a, amah rin ngam a ngai ang hian Central aṭanga Malsawmna tak tak kan neih theihna tur chuan Central Sorkara rinna nghah hi a ngai a ni. Mizoram ah chuan Pu Modi-a hi a vakvai hle mai a, MADC ah chiah an lo thleng duh tawh a, Development pawh an dawng zel dawn a ni. Mizoram mipuite kan harh a hun hle mai. Kalphung thar hnuaiah pawh phunchiarna bawk kan hmu leh mek a, Pu Modi vahvaihna hi Mizoram ah hian duh tawk tir tawh ila, kan beisei Development, kan Politician kal tawh leh ni mek te’n a sawi a sawi chauhva min thlen sak ṭhin ang nilo, Development a taka kan hmuh theih nan BJP hi kan behchhan a ngai a ni,” a ti bawk.
Vanlalhmuaka chuan, “Rev. Dr. Lalchungnunga Mizo zinga Pathian rawngbawltu Ropui takin Van kohna min chhansan ta hi kan sun hle a, amah kan uizia leh chawimawina leh zahna atan puan in kan tuam a ni. Pu Lalchungnunga hi a rawngbawlna sulhnu ropui tak kan hmuin kan hria a, hei hi Mizorama Rawngbawltu te’n kan darthlalang ah hmang ila, a nuna entawn tlak tak hlei nei miah lova a awm te hi Mizoram Ringtute hian kan entawna kan nunpui atan a ṭha hle a ni,” a ti bawk.
Inkhawmah hian Vanupa Zathang, IPS (Retd), State Vice President leh JB Rualchhinga, State Vice President te’n thusawina hun an nei bawk.