Nimin khan ZPM chuan an Party Office ah chhung inkhawm an nei a, he huna thusawitu C. Chalsawithanga, Consultant chuan, “MLA-te hi dan siamtu turte an ni a, mipuite hman tur leh tangkai dan tha tak kan mamawh reng a, chumi rual chuan tha taka kenkawh pawh a ngai. Tun hma lama kan legislator-te khan dan chu siam ve bawk mahse kan ram leilung mil leh, kan sakhaw milte, kan sik lehsa miltea dan siam chhoh zel a tul a. Tun Sorkarah hian kan Legislator-ten dan thar engemawzat an duang chho ta mek niin ka hria a, ka lawm hle a ni. Pu berte fakna dan ringawt ni lo, ram mipui mamawh dan tha siam kawngah kan theihtawp kan chhuah zel a ngai” a ti.
C. Chalsawithanga chuan, “Kalphung thar kan tih hi System thar tihna a ni a, khawvel ram hrang hrang hian ram inrelbawlna tha nei turin DAN tha tak tak an siam thin a, dan tel lo chuan ram changkang a awm thei lo a ni. Mizoramah pawh District Council hun lai khan kan nu leh pa te hriatna leh thiamna lamah pawh degree sang la nei lote kha legislators niin, anni chuan thangthar ten an rawn siam that leh turin dan 100 chuang lai min lo hnutchhiah a, hun a lo inher zela, District Council hun a liam a, UT kan nih hnu pawh khan dan siamthat aiin sum leh pai lamin kan rilru a luah ta zawk niin a lang a, kan mi hmasaten dan siam lam an rilruah a la lang vak lo a ni. Tun hnuah State kan lo ni ta a, mithiam tak tak MLA kan lo nei ta, chuti chung pawhin dan lam kan ngaihthah chho ta zela, Central atanga dan lokal sum keng tel erawh kan umzui chak em em thung a, nihmahsela mipui tana hamthatna tur leh ram hmasawnna tur lam kawngah chuan DAN thar hi siam kan harsat em em mai a ni,” a ti a.
Sawia chuan, “Kum 20 lai zalenna sualin, mahni inrelbawla dan siam ve thei nih inbeiseiin kan bei a, hlawhtling lo mah ila, India Sorkar chuan State-ah min hlangkaiin mahnia, dan insiam ve thei turin min buatsaih a, nimahsela, kan legislator lo ni tawhte khan, mipuite tana DAN tha siam ai chuan Khuallian ni a thil hawn tur kan zawng ber niin a lang a, kan ram leilung mil leh, kan sakhaw milte, kan sik lehsa miltea dan siam hi a tul ta hle a, Tun Sorkar ah hian kan Legislator-ten dan thar an duang chho ta mek niin ka hriaa, ka lawm hle a ni. Legislatorte hian an hna tur an hriat chian a ngai em em a, Sorkar hmasa kan lo hrawn tawhte ah khan legislator-te hna ber pakhat chu an Pu ber fak ani a, DAN tha kan neihte pawh an thutbet zo ni berin a lang. India danin tribal-te min humhalhna dan tha tak takte pawh hi kan ngaihsak lova, dan khirh tak tak mipui tana hnawksak zawk kan in lek khum leh thin hi a pawi hle a ni. Sorkar thar hi chuan dan siam kawngah tan la se ka duh hle a, kan ram mil leh kan mipuite dinhmun thlir chunga legislators ten huaisen taka dan an siam hi a tul hle a ni,” a ti bawk.
Nimina chhung inkhawm hi C.Lalthanfela, PAC member chuan a kaihruai a, Rev.Robawiha VUC member chuan hunserh a hmang bawk.