Nimin khan Bawngthah khua chuan an Branch YMA Kum 75-na lawmna hun an hmanga, he hunah hian Lalrintluanga Sailo, Dampa Bialtu MLA chuan Khuallian niin a hmanpui.
Bawngthah Branch YMA hi kum 1949 ah din a niin, tunah hian YMA member 339 awm mekin, Mipa 176 leh Hmeichhia 163 an awm a, YMA Life member 7 neiin hruaitu hlun chawimawina dawng tawh hruaitu pathum lai an nei bawk.
He huna Khuallian Lalrintluanga Sailo chuan YMA Platinum Jubilee lungphun hawnna hun neiin, “YMA hi ṭanpui ngaite ṭanpuitu pawl ropui tak a ni tih ka sawinawn duha, chutih rualin khaw hrang hranga ṭanpui ngaite kan ṭanpuina kawngah emaw, YMA anga ke kan penna kawngah kan in enfiahna tur a awm em aw ka ti a ni. A chhan chu khaw hrang hrangah YMA anga hmalakna kan neih dawn reng rengin, hnathawka penchhuah aiin a ti thei ni a kan hriatte hnena kan dil chhuah hi atam zawk mah mah em tih hi ka ngaihtuah fo mai a, hei hi YMA lo awm zel tur kalkawng atân ṭha ka ti lo a, vawiinah nangni Bawngthah Branch YMA ten in kum 75-na in lawmna turah engmah min dil hauh lo a, min rawn sawm hi ropui ka tiin ka lawm hle mai a, he thu hi inthlahrung hauh loin inhnenah ka sawi a ni. Ṭanpui ngaite ṭanpuitu kan nih leh zelna turah mahni insen huama theihtawp a penchhuak ṭhin YMA nih i tum tlat ang u.” tia thu sawiin Bawngthah YMA leh NGO dang te hnenah Silpaulin apek bakah YMA Platinum lawmpuinan cheng 10,000/- a pe bawk.
Bawngthah Branch YMA Jubilee lawmna hun hi Central YMA hruaitute bakah, Sub-Hqrs leh Group YMA lam aṭangin hruaitu engemaw zatin an hmanpui, Central YMA Asst.Secy., Fabian Lalfakawma chuan Souvenir tlangzarhna hun hmangin. “Vawiin hi lawmna ni a ni a, Bawngthah Branch YMA in a piancham alawm a ni. Kan ramah YMA a Upa ve ta hle mai a, zuih a hnekin alian telh telh zawk a nih hi, YMA thawm thangva rimawi tak ah hian miten tel ve zel an châk a ni tih alang awm e, chutih rual chuan YMA hi kan Pi leh Pu ten engtinnge an lo kalpui ṭhin tih kan ngaihtuah fo ṭhin tur a ni a, Mizo chauh nupui pasalah neiin YMA a lo ṭhanlen zelna turin kan inthlahpung zel anga, Bible in min zirtir ang leh kan Pi leh Pu ten min zirtir ṭhin angin Ai-a Upa zah kawngah pawh i infuih thar zel ang u”, tiin ram puma YMA dinhmun leh YMA anga hma kan sawnna tur ṭhenkhat a sawi bawk.
Bawngthah Branch YMA Platinum Jubilee hi khawtlangin a lawmna hun hmangin, Cheraw leh Khuallâm te an neih bakah Jubilee Dar vua in, tlaiah ruai nen hlim takin an lawm a ni.