Nimin khan Republic Veng Community Hall-ah MHIP Republic Veng Branch Golden Jubilee lawmna hun hman a ni a. He hunah hian C. Lalsawivunga, Minister, AH & Vety, Art & Culture, LAD etc. chu khuallian niin, ram hmasawnnaa nute mawhphurhna pawimawh zia a sawi.
C. Lalsawivunga chuan, “MHIP hi Kristian nun dan tha chawisanga, kan mizo culture leh society vawng nung a hmeichhiate dinhmun siam thatna leh chawikanna kawnga mawhphurhna keng tura pawl lo ding chhuak a ni a, vawiin thlengin pawl hruaituten chu thinlung chu an vawng nung tlat a ni. An hmalakna avangin hmasawnna pawh hmuh tur tam tak a awm a, vawiinah pawh pawl din chhan vawng nun tlat turin hma la thar leh ang u,”a ti.
“MHIP hian thupui pawimawh tak a nei a, chu chu mite tanpui a ni a, hei hi Lal Isua zirtirna leh nun ze laipui a ni. Vawiinah hian mite tanpui thei turin kan rilru kan siam thar ka duh a, kan tih theih chin erawh a inang vek dawn lo a, a pawimawh ber chu mite tanpui thei tura midang tana inpekna thinlung zawk hi a ni,” a ti bawk.
Sawivunga chuan, “Ram leh hnam hmasawnna kawnga hmeichhiate pawimawhna hi kan hriat thar a ngai a, kan ram tan hmasawnna hna kan thawk thei tih hi kan hriat nawn fo a ngai a ni. Hmeichhiate hi inchhungkhurah in pawimawh em em a, kei ngei pawh tun dinhmun ka thlen theih nana mi pawimawh tak chu ka nupui a ni a, ka nupui hian min thlawp tha loin emaw min fuih hram hram lo se, tun dinhmun hi ka thlen ka ring lo a ni,” a ti a. “Sawrkar office-a dinhmun pawimawh tak takte hi hmeichhiaten an luah tawh a, chutih lai chuan nute hian inchhung khur an luah lum a ngai a, nuten in chhung khur an luah lum a, an tih tur an tih hi ram hmasawnna hna leh inrelbawlna kawngah a bul pawimawh ber a ni,” a ti.
AH & VETY Minister chuan, “Tunlai hian kan ramin harsatna namen lo kan tawk a, chu chu eirukna, mipat hmeichhiatna hman sual leh ruihhlo a ni. Heng avang hian kan ram a mualpho nasa em em a, chhungkaw thahnem tak a keh chhe mek a, khawtlangin harsatna a tawka, ram leh hnamin a mualpho a, Kohhran thlengin kan tuar a ni,” a ti a. “Pathian tihna hi kan thinlungah awm tlat se la, kan inchhungah dikna leh Pathian laka rinawm turin inzirtirna uar thar leh ila, tichuan kan ram hian hma a sawn dawn a ni,” a ti bawk.
Nimina an hun hman hi F. Lalnunsiami, President, MHIP Republic Veng Branch in a kaihruai a, C. Liankhumi, Finance Secretary-in hunserh hmangin, Mal zai leh Zaipawl zaite ngaihthlak a nih bakah Souvenir tlangzarhna hun hman a ni a, Hruaitu chawimawina leh Bial chhunga mi hmingthate chawimawina hun an hmang bawk.