North East Region Missionary Retreat vawi 5-na chu ni 11 July 2024 (Ningani) atang khan Bawngkawn Presbyterian Kohhranah neih a ni a, Pathianni zan khan a tiak.
Kumin Retreat hi Hmarchhak biala Missionary te leh an chhungte tana buatsaih a ni a, Retreat-ah hian Thupui atan ‘Chanchin Tha Hril’ (Matthaia 28 : 19 & 20) tih hman a ni.
July 11, 2024 khan he retreat a tel tur missionary te hming pek luh hun hawn tan niin, Zirtawpni (12.7.2024) nilengin missionary leh an kawppuite tan paper zirho buatsaih a ni a, chawhma ah Upa Dr C Lalhrekima buatsaih ‘Mental & Physical Health Awareness’ tih thupui zir ho a ni a, chawhnu lamah ‘Tunlai North East India-a rawngbawl dan tur’ tih thupui hmangin Rev. Dr. Lalrinkima, ATC buatsaih zirho a ni bawk.
Inrinni (13.7.2024) nilengin testimony sawi leh fakna inkhawm a hun hman a ni a, Inrinni zan atanga Pathianni chawhnu thlengin retreat thupui ‘Chanchin Tha hril’ tih thupui then hrang hrang ngaihthlak a ni. Missionary thawk lai boral mi 4-te sunna hun Pathianni chawhnuah hman a ni.
NE Region Missionary Retreat ah hian North East field pasarih atangin Pathianni chawhma thleng khan missionary 710 inziak lut an awm a. An chhungte nena missionary Bawngkawna riak lut zat hi mi 947 an ni. Missionary leh an chhungte retreat hmang tura rawn kal hi mi 1480 chhinchhiah an ni bawk.