Nimina MNF Hnam Runa chhung inkhawma thusawitu MNYF President leh MLA nibawk Robert Romawia Royte chuan ‘ZPM a an hotuten timna nei miah lovin an sorkar hma leh an sorkar hnuah pawh mipui dawt an hrilh nasa a,hei hi kan hnam leh sakhuana atan pawh a thatloh avangin mipuite thudik hrilh kawngah MNF ten nasa lehzuala tan lak a tul a ti a.MNYF chuan mipuiin thudik an hriat theihnan ZPM Sorkar hotute dawt sawi hrang a video leh a hard copy te puangchhuak turin DAWT HAL Programme an siam tur thu a sawi.
Hachhek bialtu MLA chuan ZPM sorkar hotuten khawchhhak atanga dan phalloh thil lolutte thla 1 chhunga tihtawp an tiam laiin a zual tulh tulh a,Kuhva ro Kudama hrenbeh sa Bag 5000 chuang pawh smugglers ten nuamsain an la chhuak thei a;Kuhva tawlhrutute an huangtau em em chhan hi ZPM hruaitu thenkhat vang niin alang a ti.
MLA Robert-a chuan dan lova kuhva tawlhruk avangin Hachhek bialin kan tuar nasaa Hachhek bialah hian dan lovin tuman kuhva rawn phurlut tawh lo se,lo phurlut lui an awm chuan an tan a pawi thei tih ka puang chiang duh a ni a ti.
MNYF President chuan Minister pakhatin Pathian an tih vanga UC dik lova siam duh loh vanga SASCI sum lapse ta anga a sawi kha a pawi a,dawt thupmawi nana Pathian hming hman kha a pawi hle a ni. ZPM sorkar hian SASCI sum hi avaiin Finance Deptt ah an kawl tang tlat a,SASCI sum lapse kha ZPM hotute Pathian tih vang nilovin 1st instalment sum Deptt a pechhuak lova an kawl tlat vang zawk a ni. SASCI sum leh Central projects sum dangte pawh hi hlawhah an hmang zel a,chu chu sum an pekchhuah loh nachhan a ni.Hlawh chu State Annual Budget atangin pe se,Central projects sum te chu a project enkawltu Deptt ah pechhuak ve thin tawh rawh se’ a ti.
ZPM sorkar tirha CBI kuta thuneihna pumhlum(general consent) an pek chu reilote hnuah tidanglamin eirukna chhui turin state sorkar phalna CBI in a lak zel a ngai leh ta.CBI chungchangah pawh inbumna a thleng mek a,CBI an hlauhna chhan hi a rinzawn theih MLA Pu Roberta chuan a ti a.
MNF Adviser leh MLA nibawk chuan tunhnaia Council of Minister in contractorten tender an chhan san theihzat leh chhan hniam theihzat bituk siam chu contract dan kalh nia sawiin tender chhanna rate inang a tam dawn a,chhanna rate inangah thum an vawr zel dawn anih loh chuan mahni duhsak zawng hna inpek tumna a ang a,MNF chuan kan enzui zel dawn a ni a ti bawk.