BJP Mizoram State chuan an Office, Upper Republic ah nimin khan karthar inhlanna leh Political Session hun an nei a, Lalbiaknunga, Ex Freedom Fighter Chairman-in inkhawm a kaihruai a, Vanlalhmuaka State President-in thusawina hun a nei bawk.
Vanlalhmuaka, State President chuan, “He ramah hian thudik kan tluksan ṭhin hi a pawi takzet a ni. Hindu-te hi an Hindu hle kan ti ṭhin a, an thurin hi ‘culture’ ah an nei tawp a. Keini pawhin, an Kristian hle min tih ve theih nan, Kristian ṭha tak nih tum ang u, Kristian nun dan ṭha tak Mizoram mipuite hian zawm ni ta ila chuan state dang leh ram dangte pawhin nun dan ṭha an rawn zirna hmun a ni ang. BJP-a kan awm chhan chu kan ram leh hnam tan a ni a, ram dang tan a ni lo, kan ram neihchhun Mizoram tan a ni. Mizoram hi kan ta a ni tih kan chian a, neitu nihna dik tak kan ni tih kan hre reng tur a ni,” a ti.
Hmuaka chuan, “Isua’n min zirtir angin amah zuitu te chu, tlangchhipa khaw awm angin a tehkhin a, Mizoram tlangrama awm kan ni a, keini tlang chhipa awm te hian kan eng hi State dang ten an rawn hmuh theih nan, Krista zirtirna kan zawm hi apawimawh hle a, Kan hnam nun dan dik tak pipute aṭanga kan neih kha chhawmnun zel tur a ni,” a ti.
Hmuaka chuan, “Eng vanga BJP-a awm nge ka nih? Eng vanga Krista hnungzuitu nge ka nih? BJP chuan kan Manifesto a kan dah Zoram tana chhenfakawm tak tak kan sawi thin te kha Mizoram tana kan tihtur pui ber ala ni reng a, hriselna ṭha leh eizawnna tam tak Mizoram mipuite pek a, intodelh tir hi kan tum ber a ni. Mizoram mipuite hian kan tihsual chiang êm êm chu; kan ramina a mamawh pe theitu leh ngaihtuahsak theitu lam hawi lova, angaihna hrelo lam kan hawi tlat thin hi kan tihsual pawi tak a ni. Mahni ram cheina tur eiru duh tam tak awmna state kan ni tlat hi a pawi takzet a, kan awmna tlang sang mahse Keimahni avangin ringlo mi tamtak ten Pathian an fak theilo hi a pawi hle a ni,” a ti a.
Sawi chhunzawmin, “Mizoram Sawrkar hian tum mumal tak nei ṭhin niin, Mipui hma kan intiamna te anga ti ṭhin ni ila heti mai zawng kan ni lo tur a ni. Tun hma aṭanga sawrkar tawhte min kaihhruai ṭhin anga vawiin thlenga kan la awm hi a vanduaithlâk in, kan ram mamawh tam tak nei lova vawiin thlenga kan la awm ta reng mai hi a pawi tak zet a ni. BJP erawh Manifesto-a inziak tihlawhtling ṭhin party kan ni tih hi Mizoram mipui te min hriatpui turin kan ngen che u a ni,” a ti bawk.
“Vawiina ka lawmna êm êm chu kan vote share pung chho zel hi a ni a, keini chu smuggling-a innghat party kan ni ve lova, kuhva tawlh ru ṭhinte titawp tura intiam a, titawp leh theilo ang party kan ni ve lo. Party member-te huaisen taka kan kal zel a ṭul a, Pathian nung bia kan ni tih inhria a huaisen taka hmalam pan zel turin kan infuih bawk a ni,” a ti bawk a ni.
Inkhawmah hian Vanupa Zathang IPS (Retd) State Vice President pawhin thu a sawi bawk a ni.