ZPM party office-a chhung inkhawm hun hmannaa thusawitu Lalsawivunga, Minister chuan, “Kum 37 sawrkarna inchhawk siamtuten an tih theih loh, tih duh loh leh tih ngam loh thla 7/8 vel lek chhungin thil tha tam tak kan thawk a, chuvangin opposition-te hian min sawisel bak tih theih an nei lo,” a ti.
Nimin khan he thu hi Lalsawivunga chuan sawiin, “MNF sawrkar khan leiba cheng vaibelchhe 13,584.80 zet min hnutchhiah a, khatihlaia Budget pumpui kha a vaiin Rs.14209.94 crore niin an budget hnuhnung bera leiba tling khawm kha budget pumpui atangin 95.6% zet a tling a ni! He leiba phur chung hian ram rorelna kan kalpui chho ta a, puk lo thei lova min siam avangin kan puk a, puk chhunzawm zelte pawh a la ngai ang. He sawrkar hian sum kan puk a nih pawhin a hmanna tur dik takah kan hmang dawn a, dik tak zelin kan kalpui dawn tih Mizoram mipuite hnenah ka chah duh a ni. Tunlaia Social Media chak tak karah kan tih dik loh pawh ni lo, tha taka kan thawhte sawiselna a tam a, a bik takin kan Chief Minister phei chu mimal takin an bei nasa em em a. Opposition Party-te hian politics ni a an hriat chu rorel lai sawisel a ni ber a, thu dik tawk lo leh rintlak mang loh hmangin a rem dan danin sawrkar an sawisel a, sawichhiat hrim hrim tumna ni berin ka hria. Kan dik lo a nih chuan min sawiselna kan pawm a, a dik min hrilh turin kan beisei bawk a ni. Kum 37 sawrkar inchhawk an siam chhunga an tih theih loh, tih ngam loh leh tih duh loh thil thate thla 7/8 vel lek sawrkar hian a tih chat chat zel avangin sawisel bak tih theih an nei lova, thil tha ti tura din he sawrkar hian sawiselna karah pawh ke a pen chho zel dawn a ni. Kan hriat angina Health Care bill ba te, eng chhitna man ba tam tak pek a ni a, sawrkar hnathawkte hlawh nise thlatir lamah pension hlawhte nen kan pe thei zel a, pension la chinfel loh tam tak chinfel chhoh zel niin kum 20 chuang zet sawrkara lo thawk tawhte dinhmun chawikang turin dahnghehna turte siam a ni bawk a, hun reilote chhunga he sawrkar hmalakna tha tak takte hi zep tur a awm lo. Heng bakah pawh thil tam tak hmalakna thar kan nei a, hengte hi opposition-ten an sawrkar laia an tih duh loh leh tih theih lohte an ni hlawm,” a ti.
LAD Minister Sawivunga chuan, “LAD-in kum 1953 Village Council Act & Rules kan hman mek hi a hlui hle tawh a, hei hi amend turin ruahmanna kalpui a ni a, VC/LC inthlan hunah chuan dan thar hnuaiah kan inthlan theih kan beisei. 15th Finance hnuaia 2021-22 Grant te kha chinfel loh a la ni a, kan sawrkar hnuah chinfel niin rang leh dik takin a kalna turah sum kan kaltir zel tawh a ni. Art & Culture Department hnuaiah Chapchar Kut te pawh budget-ah kan nei chho tawh a, hna thar post 14 kan dil a, min pawmsak angina kan la dawn. AH & Vety-ah hmathar lak chho mek a ni a, saah kan intodelh loh avangin ran chaw atanga bul tan a ngai a, Thenzawlah tin 72 a zau siam a ni. Vaimim hi state dang atangin Rs.24/Kg in kan lalut a, Myanmar atangin hetiang tho hian kan lei bawk a, ranchaw a intodelh turin Bekang-ah pilot project siamin hma kan la mek a. Vaimim chinna turin Champhai district leh Saitual District te kan thlang bawk. Minority lamah hmathar lakna tur project 68 central lamah thehthlak a ni tawh bawk a, theihtawp chhuahin hma kan la mawlh mawlh reng a ni,” a ti a.
“Post Devolution Revenue Deficit (PDRD) Grant te pawh central sawrkarin min pe tlem tial tial a, MNF sawrkarin budget an pharh hnuhnung ber 2023-ah khan PDRDF an tih hi cheng vaibelchhe 1474 a ni a, kumina kan Chief Minister leh Finance changtu ni bawkin Budget a pharh ah khan cheng vaibelchhe 1079-ah a tla thla a ni. Nakkum 2025-26 ah phei chuan vaibelchhe 586 chauh kan dawng tawh dawn a ni. Chutiang chu a nih avangin he sawrkar hian a sum neih ang angte hi revenue thawkchhuak zawnga hmang turin a kalpui zel a ni. Lolet tur awm miah lo NLUP leh SEDP sum ral thak thakte ang ni lovin kalphung thar mipui sawrkarah chuan kalpui a ni dawn a, kan ramah rorelna tha a lo awm a, mipuiten hmasawn lam kan pan zel theih nan mipuite tawiawmna tha tak kan beisei a ni. He sawrkar hian thla riat hmel a lo hmu ve dawn ta a, hemi chhung hian hnathawhna hun erawh tam lo mahse Chief Minister Pu Lalduhoma kaihhruaina hnuaiah theihtawp kan chhuah a, sawrkar kutke ber sawrkar hnathawk, a hniam atanga a sang ber thlenga theihtawp chhuahtute chungah lawmthu ka sawi a. Ni 100 chhunga tihhlawhtlin tur kan Chief Minister-in a puan tihhlawhtlinna kawngah Party leh mipuiten min thlawp tha em em a, lawmthu ka sawi bawk. Kan Chief Minister hian Mizoramah sawrkar tha leh rorelna dik a thlen theihna turin a thawkrim em em a, a taimakna leh thawhrimna bakah a inzir peihnate fakawm ka ti a, a kaihhruaina hnuaiah hun rei lote chhungin Mizoramin thil thar tha tak tak kan tawng chho mek tawh a ni,” a ti bawk.
Nimina party chhung inkhawm hi Er.Lalhmingliana, PAC member chuan kaihruaiin Rev.C.Lianzuala, Adviser chuan hunserh a hmang a, Richard Vanlalhmangaiha, Lok Sabha MP, Lalfamkima, Dy.Speaker leh Lalmuanpuia Punte, Adviser to CM-ten party chhung inkhawm hi an hmanpui a ni.