- Zoliansanga Tlau
July ni 14, 2024 zan dar 12 : 30 khan Olympiasstation, Berlin, Germany ramah Spain leh England te’n EURO 2024 final khelin 2 – 1-in Spain an chak a. Tum li an chakna a ni. July ni 15, 2024 zingkar khan Hard Rock Stadium, Miami Gardens, Florida-ah Argentina leh Columbia ram te paw’n Copa America final khelin 1 – 0-in Argentina an chak a. An chakna goal khungtu hi L. Mertinez niin, a pet goal veleh bench a thu leh inhliam vanga inkhel tluan thei lo Messi kum 37 upa leh an captain ni bawk lam pana tlanin an inkuah a nih kha. Heti hian Argentina hian Messi hoin Copa America tum hnih an champion ta a – kum 2021 leh 2024. Tin, Kum 2022 khan Finalissima-ah an chak leh bawk a, kum 2022 khan World Cup no mawi an chawi leh bawk a nih kha.
Lionel Messi hi Club tan che thain mimal chawimawina hrang hrang dawngin hui teuh mah se, ram tana a chet tha tawk loh avangin sawisel leh sawi hnawm, dem leh deu a hlo fo tih kan hria ang. Vai film ang deuhin kum 30 a pelh tawh hnuah a ropui tulh tulh zawk emaw chu tih turin ram tan Trophy a chawi mawlh mawlh mai hi a lawmpuiawm ngawt mai. Messi, Ronaldo te inkhel kan hmu thei a kan awm hi kan next generation-te hnena insawitheihna tham a ni ang. Chutiangin, Ronaldo (Brazil), R. Carlos, Ronaldinho, Zidane, Luis Figo leh mi dangte pawh. Sawiseltu, dem leh deu tute ngawi tura Messi leh Argentina hlawhtlinna kawngah kum 2022 World Cup kha niin ka hria. Kum 2022-ah han let leh lawk teh ang u.
Kum 2022 World Cup-ah Argentina leh France te’n final khelin Argentina an chak tih kan hre theuh âwm e. Infiamna lam ziakmi te chuan final hmuhnawm tak kan hmu an ti tlangpui. A chhanchu minutes 90 chhung inkhelah an inhneh tawk a, minutes pek belhah pawh an la inhneh tawk cheu va, a tawp a tawpah penalty hmangin Argentina an chak ta zawk a nih kha. Tihian Argentina chuan tum thum World Cup no mawi an chawi ta a: 1978, 1986, 2022. Team Captain Lionel Messi a fakawm a, a lawmpuiawm bawk a, a ngaihsanawm lehzual bawk.
World Cup hi kum 1930 atanga bul tan niin kum 92-a upa a ni ve ta a. He tournament hi kum li danah khelh thin niin Brazil chu World Cup no mawi châwi tam ber ram a ni a: tum nga (5) ngawt a châwi tawh.
Kumin World Cup Tournament-a match zawng zawng ka en vek hman bîk lo va. Argentina inkhel erawh hmaih nei miah lovin ka en kim vek thung.
Dt 22/11/2022 khan Argentina leh Saudia Arabia te an inkhel a. Argentina-in 4-4-2 formation leh Saudia Arabia-in 4-3-3 formation an hmang a. 1 – 2-in Argentina an chak lo a nih kha! Messi penalty pet goal hmangin an chak zo ta lo a ni. World Cup Trophy chawi tura rinkaiin Saudia Arabia an hneh lo kha khawvel mak tih a ni a. He match zawh atanga thil kal chhoh zel dan hi a ni ropui a, mak a, sawi nuam em em bawk chu.
Argentina-in Saudia Arabia an hneh loh tum khan Messi-a’n “Hetianga bul kan tan ta mai kha kan beisei leh duh dan a ni bik lo va” a tia a. Sawi chhunzawm zelin “Chhuanlam han sawi vak tu pawh kan nei hran lo. A hma aiin kan tangrual leh zual dawn a… hun hrehawm tak kan tawng a, hetiang result hi kan beisei lo bawk…kan inkhel lehna turah a hma aia titha zawk turin kan bei ang,” tiin Argentina team-te fuih pahin anmahni tantute a hnem bawk a nih kha. Messi-a’n”kan inkhel lehna turah a hma aia titha zawk turin kan bei ang,” a tih kha a takin a thlen dik tir dâwn a ni tih he thu a sawi lai hian an la hre kher lo vang.
Dt 27/11/2022 khan Argentina leh Mexico an inkhel a. 4-4-2 formation hmanga in remin Mexico 2 :0 in an hneh a. Hetah hian Messi leh Enzo Fernandez-a te goal hmangin an chak a ni. Hemi tuma Argentina possession chu 58 niin Mexico 42 a ni a. Chak an phu hle.
Dt 1/12/2022 khan 4-3-3 formation hmangin Poland an hmachhawn leh a. Awlsam takin Allister leh Alvarez te goal nih hmangin 2 :0 in an chak leh a nih kha. Hemi tum phei hi chuan Poland hian ball an chang mang lo va: 70 versus 30 possession a nih nghe nghe kha!
Dt 4/12/2022 khan 4-1-2-3 formation hmangin Australia an hmachhawn leh a. Messi leh Alvarez te goal hnih hmangin 2 :1 in an chak leh bawk. Hemi tuma Messi goal thun hian sawi zui a hlawh hle a. Australia player-te bit taka an awm khawmna lai awl chhe teah a pet goal vang a ni ang. Argentina hian ball an chang tam zawk a: possession 60 – 40 a ni bawk.
Dt 10/12/2022 khan 3-5-2 formation hmangin Netherlands nen an inkhel leh a. Nahuel Molina leh Messi te goal hnih thun chu Netherlands lamin an sût leh vek avangin penalty hmangin 4 – 3 in Argentina an chak a ni. Hemi tum hian Yellow Card hmu an tam hle a. Netherlands lam hian mi 9-in yellow card an hmu a, Argentina lam hian mi 8-in yellow card an hmu bawk. Netherland lam atangin mi 1-in red card a hmu bawk. Messi meuh paw’n yellow card a hmu a nih kha. Game a tang a, an tang bawk a. A hmuhnawm hle. An inti buai nghe nghe a. Hemi tum hian Netherland-in ball an chang tam zawk a: 52 – 48 possession a ni.
Dt 14/12/2022 khan 4-4-2 formation hmangin Croatia an hmachhawn leh a. Inkhel pumpuiah Croatia-in ball an chang tam zawk nachungin Alvarez goal hnih leh Messi goal khat hmangin 3 – 0 in awlsam takin hnehtu an ni leh.
Dt 18/12/2022 zan dar 8 :30 khan Final hmuhnawm tak mai Argentina leh France te’n an khel a. Argentina-in an chakna bulpui formation 4-4-2 bawk an hmang leh a. France-in 4-1-2-3 an hmang thung. Argentina-in hun tam zawk game an thunun a, ball an chang tam zawk bawk a. France thiampuipa Mbappe meuh pawh a che hlei thei lo. Di Maria leh Messi te goal khat ve ve thun hmangin chak chiang turah ngaih a ni hman a; amaherawhchu, 2nd half hun tawp dâwn hnaiah France lamin si hnih an phurh an sût zo der mai. An in draw avangin an inkhel leh a, hun tawp dâwn hnaiah Messi-a’n a pet goal a. An chak ngei turah kan ngei deuh vek ang. Mahse, France lamin an sût leh hlauh! An la in draw avangin penalty an pet a, 4 – 2-in Argentina an chak ta zawk a ni.
Kan sawi ta duah mai a. Eng pawh ni se, Chaklohna atangin chakna dinhmun a Argentina an awm theihna kawngah hian zirlai zir tur kan neiin ka hria. I’n zir ho teh ang u aw:
- An game hmasa bera Saudia Arabia an hneh loh tuma Messi thusawi khan a team leh amah ngei pawh tiphur thar lehin an la khelh tur game lehah a aia tang nasa lehzual turin a hnawr kal. Saudia Arabia an hneh lo phawt kha an tan malsawmna a lo ni. Ni e, kan mihring nun pawh hi a tluang purh lem lo fo a nih hi. Mahse, Argentina game atang hian zirlai zir thar leh ang aw.
- Argentina team thawhhona a tha. World Cup hmasa a Messi khelh puite’n Messi kuta engkim a an innghat ang khan an innghat tawh lo. An vaiin an pawimawhna an inhria a. An tangrual a, chak an tum tih an khelh danah a hriat theih.
- An team captain Messi an sawisel fona “Hruaitu tha a ni lo” an tih thin chu tun tum World Cup hian a nawt reh kan tithei ang. Kum 35 lai a ni tawh avangin a hma angin a tlan zung zung thei tawh lo. Mahse, chak a duhnain nawr kalin theih tawp a chhuah a. He world cup zet hi chu Messi-a world cup tih mai tur a ni – game tinah a khel tha deuh vek a, fak a phu hle.
World cup hmasa a, an lama goal a luh a, a hnual hmel leh phur lo hmel hmuh tur a awm tawh lo. Saudia Arabia an hneh loh tum pawhin a team te Fuihna leh Argentina tantute a hnem dan atangin a hriat theih. A khaikhawm nan chuan football player a nih bakah hruaitu tha ni turin a inzir fing kan tithei ang. “I thiltihin mi dang a tihphura, ruahmanna thar a neiha, hmalam pan zel tura beiseina thar a pek phah chuan Hruaitu i ni tihna a ni” tia John Quincy Adams-a sawi kha Messi hian a nunpui kan tithei bawk ang.
- Argentina Coach Lionel Scaloni kha fak a phu bawk. An hmachhawn tur a zira formation siam leh insiamrem a thiam. Hetiang tithei tur chuan an hmachhawn turte chet dan phung hriat chian tuma zir chian a ngai tih a chiang. A player Enkawlte luh hmasak tir tur leh thlak hun a hre bawk.
- Messi-a leh Di Maria te theihna hriain an khelh puite’n chu chu sawr chhuah an tum. Kha kha an chakna chhan pawh a ni tel tih hi ka ngaihdan a ni. Keini aia thiam leh tha zawk te hman tangkai thin hi pawl hmasawn nan atul khawp mai. Initsik leh chapona avangin thiante theihna hmeh pin sak emaw an kawng khar sak emaw theih a ni.
- Hlawhchhamna te, beidawnna te, hrisel lohna te, retheihna te hi kan hman thiam chuan hlawhtlinna bul, beiseina bul, hriselna bul, hausakna bul a ni thei ang. Chaklohna pawh hi chakna atan kan hmang thei tih a chiang bawk.