The Writer’s Club leh Laisuih Zirbing Rûn tangdunin Covid 19 hri len laia Thawnthu tawi inziahsiak an buatsaiha a ṭhazual 20 dah khawm, “Hripui leng kâra hmangaihna” tih chu nimin khan MJA President C. Lalrambuatsaiha’n Emerald Hotel Conference Hall-ah a tlângzarh.
Lehkhabu tlangzarh paha thu a sawinaah C. Lalrambuatsaiha chuan, mihringte hi Pathianin hun inang tlâng vek a pe a, an hman tangkai dân erawh a inang lo hle tih a sawi a. Tuna lehkhabu an tlângzarh tâk pawh hi Covid 19 hri len lai, hnathawh theih loh laia hunawl tangkai taka hmangtute vanga lo chhuak a nih avangin a hlu hle a ni, a ti.
C. Lalrambuatsaiha chuan, thu ṭha leh ril tak tak pawh ziaka dah a nih loh chuan a hlutna a lang chhuak lo fo a, ziaka dah a nih chuan a chhawrtu tam tak an awm ṭhin avangin ziak ngeia dah chu an intihhmuh zêl a tul a. Hetih rual hian, Mizoramah ziak miten an kut hah man hlawkna an tel tam tawk lo hle a, khawvel hmun dangah chuan lehkhabu pakhat lek pawh an hausakpui a, hetiang hi la tawng pha ve lo mah se, ziak ngeia dah chu intihhmuh zêl a tul tih a sawi.
Inkhawm hi The Writer’s Club President, Lalhmachhuana Zofa-in a kaihruai a. Lehkhabu khawrpumtu, Publisher ni bawk KC Vanlalruata’n thawnthu tawi inziahsiak result puangin, lâwmman a sem nghal a ni.
Thawnthu tawi inziahsiaka lawmman dawngtute : 1-na VL Muanpuia; 2-na Hmingtea Tlau; 3-na F. Lalṭhazuali an ni a. Mi 5 hnênah Consolation Prize pêk a ni bawk.