- Zoliansanga Tlau
Prof. RL. Thanmawia lehkhabu ‘Chuailo bu 3-na’ ka chhiar atangin Lalsangzuali Sailo kha piangsual a lo ni reng tih ka hre chauh va! Lalsangzuali Sailo khân a ke lamah harsatna a nei a ni awm e. “Piansual si piangsual a nih hriat hauh lo va awm leh thei mi tumruh….” tiin Prof. RL. Thanmawia chuan a ziak nghe nghe a ni.
Hetianga amah Lalsangzuali Sailo kha a lo awm vang hi ni maw rualbanlo-te kha a khawngaihin a hmangaih a, hei vang hian an tan hla a phuah nual nghe nghe. ‘An tan thian ka ni ang a’ tih hla, Lalsangzuali Sailo phuahah chuan :
“Ka kutte – kut chak lo tan,
Ka kete – ke baite tan,
Ka bengte – bengngawngte tan,
Ka mitte – mit delte tan!
An tan thian ka ni ang a,
Anmahni tihlim zelin;
Rualbanlo unaute tanpui hi,
Ka tum ve tawh ang a” tiin a han sawi a, a chang tawp berah chuan, kan mawhphurhna hetiang hian a sawi bawk:
“Famkim reng kan awm lo ve,
Harsatna nei vek kan ni;an mahni hmangaih ve hi,
Kan mawhphurhna a lo ni” tiin.
Rualbanlote hi kan hmusit tur a ni lo va; kan hmangaihin kan ngaihsak tur a ni zawk. An tan tanpuitu leh thian tha kan ni thei. An tan thian tha leh tanpuitu ni thei ila a va duhawm dawn em.
Piangsualte hmusit mai tur kan ni lo. Anmahni anga vanduaina tawka piangsual ve thei kan ni tih kan hriat a pawimawh. Hetiang a nih avang hian “Piansual leh phâr charin tlai luat a nei lo” tiin Mizote chuan kan sawi thin kha.
Kan mihringpui: zu ruih hmang, damdawi hmang suala a tel lova awm thei tawh lo, mi rethei te hi kan hmusit tur a ni lo. Chuti a hnehin kan zahin kan hmangaih hle tur a ni zawk. Pathianin ang khat vekin min en a, hmangaih dan leh duhsak dan inang rengin min hmangaih a ni tih kan hriat fo a ngai. Pathian thinlungah kan hlu em em theuh a ni tih kan hre bawk tur a ni.
Kan hma hun lah engmah kan hre lo lehnghal. Kan hmuhsit tak takte ai hian hmuhsitawm zawkah kan awm thei reng a ni tih i hria ang u.