Nimin khan ZORO chuan Aizawl Press Club-ah press conference an nei a, press conference hi R. Sangkawia President ZORO in a kaihruaia, press conference-ah hian UNO a ZORO palai kal report ngaih thlak a ni bawk.
ZORO UN palai Lalnunfela Chawngthu ZORO Western zone president chuan, “UNO-ah hian ram 194 an inziak lut a, Indigenous Peoples nei ram 90 an awm a, tun UN inkhawmpuiah hian Indigenous peoples nei ram atangin palai 730 kan kalkhawm a ni. Thusawina hun hi 3 minute pek kan ni a, duh angin thu a sawi hman loh a ni. Zofaten India, Myanmar leh Bangladesh ram chhunga harsatna kan tawh te sawi chhuah kan duh si a, hun a tlem hle a ni” a ti a.
Lalnunfela Chawngthu chuan, “ZORO hi Mizoramah chuan mi hian kan hre vak lo a nimai thei a, UNO hmunpui Switzerland-ah chuan mi hian ZORO hi an lo hre hle a, ZORO palai ka nih angin min lo ngai pawimawh hle a ni. Zofate tan ZORO thil tum hi a pawimawh em em a, khawi hmunah pawh awm ila kan ngaih pawimawh a ngai a ni. UNO a kan palai nihpui te chuan Zofate hi in tangrual tawk lo hle a, tangrual ula chuan dinchhuah theih na chance tha tak in nei a ni min ti a, in chanvo hi in ngaihsak lo a, chuvangin Zofate hian kan chanvo hi kan ngaihsak lehzual a ngai a ni” a ti.
Lalnunfela Chawngthu chuan, UNO-a a palai pui ten thu pawimawh a tih em em an hrilh thu sawi, “Zofate hi Hindu, Mosolman leh Bhudish inkarah Christian niin in cheng a, Sakhaw lian pui pui pathumin an hual vel che u a, in tan chetvel a harsa dawn a ni. Zofate tan chuan rorelna pakhat a awm a, zalenna neih in mamawh hle a ni min ti,” a ti bawk.
UN Expert Mechanism on the Rights of Indigenous Peoples 17th Session hi 8th 12th, July 2024 chhung khan Geneva, Switzerland khawpuiah neih a ni a. Mizoram atangin ZORO aiawhin Lalnunfela Chawngthu ZORO Western zone President leh KH. Lalruatpuii Serchhip te an kal a ni.