- Zoliansanga Tlau
“Madurai khawpui, Meenakshi Mission Hospital-a Paediatric Oncology Cancer unit hawng tura January ni 7, 2011-a ka kal chu thil danglam tak ka tawng a. Ka hna ka zawh hnuah chuan, mipui lam atang chuan min hmelhriattu mi pakhat hian min rawn pan hnai a. Ka bul a rawn thlen chuan, Hyderabad-a DRDL Director ka nih lai, kum 1982 – ’92-a ka driver chu lo niin, a hming chu V. Kathiresan a ni. Kum 10 chhung zet ka hnathawh pui a ni bawk.
Kan thawh dun chhung khan a hun awl neih chu Car chhungah lehkhabu leh chanchinbu chhiar nan a hmang thin a. A hun hman dan chuan min hip hle, tichuan zawhna zawtin, Engngati ngei i hun awlah lehkha i chhiar reng thin a? tiin. Ani chuan, a fate’n zawhna hrang hrang an zawh thin thu leh an zawhnate tha taka chhang thei tura chutianga ti thin a nih thuin min chhang a. A thil zir dan chuan ka thinlung a khawih hle mai a, tichuan, lehkha zir leh turin ka hrilh a; a lehkha zir theihna turin hun awl ka pe bawk; 10+2 chu zir zovin, zirna sang zawk zir turin hma a la zel a. BA (History) zovin, MA (History) a zo leh a, a hnuah MA (Political Science), a hnuah B.Ed, M.Ed a zo leh bawk.
Tichuan, kum 2001 khan Phd hial hlawh chhuakin, kum tam tak chhung Tamil Nadu sawkar hnuai-a Education Department-ah hun eng nge maw chhen a thawk a. Chumi hnu kum 2010 khan Madurai bula Mellur-a Gov’t Art Colleg-ah Assistant Professor a ni leh a ni” tiin APJ Abdul Kalam-a’n Driver atanga Professor ni thei V. Kathiresan-a chanchin a sawi (Learning How to Fly, Life Lessons For The youth, 2016, p.97 & 98).
V. Kathiresan-a chanchin hian rilru a khawih hle mai a. Kan theihna, chakna keimahnia awm hi kan lo up bovin kan lo hre miah lo thei a. Kan theihna inphu ru reng chu kan hmuh chhuah a ngai bawk si. V. Kathiresan-a pawh hian APJ Abdul Kalama kaltlangin a theihna sawr chhuah a ni a, a tawpah Driver tura inhria kha, Professor a ni ta daih a ni. A makin ava ropui em!
Chubakah, lehkhabu chhiar pawimawh zia kan hmu tel bawk. V. Kathiresan-a khan lehkhabu leh chanhchin bute a chhiar fo tih kan hria a. Hei hian a hma hun atana lehkha a zir lehna tur kawngah a pui hle ang tih a chiang. Lehkhabu chhiar peih deuh mahse, puitu an neih that loh vang emaw, ngaihtuahna an sen thiam tawk loh vang emawa nih tur ang ni lo a awm theih ang. V. Kathirresan-a erawh lehkha chhiar leh zirna ngai pawimawh mi Kalam-a a tawng hlauh a, a vannei hle.
Kan hringnunah hian zir tawp ni a awm thei lo va. In zir zela hmasawn zel tur kan ni. Kan bible paw’n “Eng pawh ni sela, kan thlen chin atang khan hma i sawn zel ang u” (Philippi 3:16) a lo tih kha.
APJ Abdul Kalam-a khan, “Ka naupan lai atanga kum 80 ka pelh tawh hnu tun thlenga, ka zin kawnga ka thil tawn danglam tak takte ka ngaihtuah kir leh hian, thil pawimawh tak ka zir chhuah chu, kan nun kawngah theuh hian duhthusam ram kan neih a, chu hmun thleng ngei tura rim taka hnathawh hi a ni. Chutianga tha i thawh a nih ngat chuan, hlawhtlinna kawng i hnaih hle tihna a ni.” a ti (My Journey ‘Transforming Dreams into Actions’, 2013, p.9).
Mahse, Paulo Coelho chuan, mi tinte hian kan tum ram kan thlen theih lohna turin kan huaisen tawk lo fo a ti a. Kan duhthusam ram kan thlen theih lohna tura dipdaltu a sawite chu:
- Kan naupan lai atanga kan duh leh kan nih tum apiang chu thil theih loh a ni tih hrilh kan nih avangin.
- Kan tih tur chu kan hria; amaherawhchu, kan tum ram kan thlen theihna tura kan beihna kawngah, hmangaihna avanga kan bula mite kalsana tihnat kan hlauh avangin.
- Kan tum ram kan panna kawnga hlawhchham kan hlauhna avangin. (The Alchemist, 99th impression, 2021, p.8 – 9)
A chhunga kan sawite khi hneha bei leta, hmalam pan tang tang a pawimawh. Mi ropui leh mi hlawhtling kan tihte hi mi tumruh leh harsatna tam tak paltanga hmalam pan tang tangtute an ni chawk. “Kan tum ram thleng tura hma kan laknah tawn hriat emaw dai hriat emaw kan nei lo mai thei a, tihsual tam tak pawh kan nei ang. Mahse, hringnun thuruk chu, vawi sarih kan tlu a nih pawhin vawi riat kan tho leh tur a ni” tia Paulo Coelho-a’n a sawi kha hriat reng a pawimawh.
Indona tual zawla awm ang reng kan nih avangin inbuanpui kan nei reng a, kan buanpuite chu an chak viau a ni thei; mahse, kan hneh thei tih kan hre reng tur a ni. Paulo Coelho-a vekin “Nitin, darkar tin hi inbeihna tha a ni” a lo tih tak kha. Bible paw’n “Mi fel chu vawi sarih tlu mah sela, a tho leh zel thin; Mi suaksual erawh chu chhiatnain a tiboral thin” (Thufingte 24: 16) tiin a lo sawi ve chiah bawk.