Dinthar veng chuanhnuai Vanapa Section, IIIrd Link road atanga Ebenezer road pawh phei tur kawng sial leh siam ‘R.Thanglura Road’ tih chu nimin zing khan R.Thanglura, Dy. Mayor, AMC leh Ward XII Corporator ni bawk chuan a hawng.
Hawnna hun tawite buatsaihah R.Thanglura chuan, hmasawnna lo thleng zel tur atana inbuatsaih lawkna leh tun dinhmunah pawh, mipui mamawhna avangin helai kawng hi tipuitling turin theihtawp chhuah a ni a. Theihloh tura mi thenkhatten an rin chu khawltlang tan anih avanga tihpuitlin a ni thei ta hi ka lawm hle a ni, a ti a.
Hmasawnna hna a taka thawh anih zel theihnan, tuna State Sawrkar awm mek leh la awm zel turte leh Aizawl Municipal Corporation (AMC) hian thawhhona nei zel se ka duh a ni,” a ti bawk.
R.Thanglura Road hi Dinthar veng chuanhnuai, Vanapa Section atanga intanin Zampuimanga Section a paltlang a, Dinthar thlanmual ramah Ebenezer road rawn pawhin Mineco leh Chawnpui lam a pawh phei bawk a ni.
Nimina hawn tak a hmawr bawkna cement concrete-a siam hi cheng nuai 50 bawr vela thawh niin, hawnna inkhawmah hian Dinthar venga awm MLA pahnih, Lalrinsanga Ralte, Serlui bialtu leh K.Laldawngliana, Tuirial bialtute pawhin hmanpui in, Dinthar Local Council Chairman leh member te bakah, Dinthar Branch YMA aiawh, MNF Unit hruaitute leh he kawng siam enkawltu Road Committee hruaitute an tel bawk.