- Ruata
Citroen chuan India rama an lirthei palina ni turin an C-Cubed programme hnuaiah lirthei thar, Basalt an tichhuak dawn a, thla thar ni 2-ah hian phochhuah an tum.
Lei theih tura tlangzarh hun erawh a la hriat loh a. Basalt hi coupe SUV huanga mi tur a ni a. Hetiang lirthei hi India ramah chuan a vang viau a, a elpui tura ngaih chu Tata in an tlangzarh hnaih, Curvv a ni dawn a, midsize SUV huangah an awm dawn a ni.
He huangah hian kan hriat angin Hyundai Creta, Kia Seltos, leh Maruti Grand Vitara te chu hralhchhuah mek an ni a. He huangah hian a design dang deuh Coupe SUV kan hmuh belh dawn a ni a. A nghahhlelhawm viau a ni.
Citroen hi India ramah an lirthei chhuak reng tawh mahse Mizoramah chuan kan la lei vak lo thung a. Hetihlai hian an huang an zauh zel avang leh he khawvel huap company lar hian hma a sawn zel avangin Mizoramah pawh hian kan hmuh har tawh loh a rinawm a ni.
Tuna chhuak mek Citroen C3 Aircross design nen a inzul viau dawn a. A kentel tur zingah hian digital instrument cluster, 10.25-inch touchscreen infotainment system with wireless Android Auto and Apple CarPlay connectivity, connected car tech, steering-mounted control, adjustable headrest, front and rear USB charger, hill hold control, dual airbag, ABS with EBD, reverse parking sensor, tyre pressure monitoring system thil hrang hrang kan hmu dawn a, a changkangin a tunlai viau dawn a ni.
Basalt coupe SUV hian a khawl lamah chuan 1.2L, 3-cylinder turbocharged petrol khawl a rawn hmang dawn a. Hei hi C-Cubed lirthei model dangah pawh kan lo hmu tawh a. 6-speed manual leh auto lamah pawh torque converter automatic gearbox a hmang ang a, 110bhp power leh 205Nm torque a pechhuak thei dawn a ni.