Congress Party chuan nimin khan Congress Bhavan ah Friday Political Session an hmang a, he hunah hian TT Zothansanga, Chairman, Legal Department chuan thu sawiin, “Remna ni kha sawrkar angin lawm a ni lova, MZP huaihawt in Remna ni kha lawm a ni a. Kha hunah khan kan Chief Minister Pu Lalduhoma hian thu sawi in, Pu Lal Thanawla hming vawikhat mah a sawi ri lo kha a mak ka ti. A lalthuthleng kian a, Remna a thlen theih nan hma la tur ber hming a lam ri lo thei kha thil mak a ni.
“Amah Pu Lalduhoma hi remna leh muanna chungchang ziaktu mihrang hrang ten Pu Duhoma hming an ziak lang ngai lo. Ka ngaihtuahna ah chuan a fatu pawimawh a inngai si kha, mi ten a chungchang an lo ziak tel si lova, a lo tel lo emaw ni aw ka ti.
“Khatih laia kohhran ho Pu Zairema te, Pu Lalsawma te hmalakna te, Zirlai pawl te hmalakna pawh kan hria. Pu Lal Thanhawla hnathawh tel lo chuan remna chungchang sawi hi a kalh a kim thei lo a ni. Pu Zoramthanga ngei pawhin Pu Lal Thanhawla’n remna leh muanna atan lalthuthleng a ken thu a sawi a ni.
“CBI General Concent hi kum 1990-1995 inkar, kum 5 lai kan lo pe tawh a, mahse tumahin case an thehluh loh avangin miin an hrethiam tawk lo ni a ngaiin sawrkar phalna lak ngai turin kan dah leh ta zawk a ni. Kum 2007, MNF sawrkar ah khan PRISM chuan CBI General Consent an hmuh theih nan Signature Campaign an kalpui khan Opposition MLA zingah tuna kan Chief Minister chiah hian a sign ve duh lo a ni. An Campaign laiin CBI General Concent pek an tiam nasa si a, tuna Criminal Law thar hi CBI General Consent hnuhkirna hmanrua ah an hmang ta a ni.
“Tun sawrkar hi thil zir chawpa kal an ni a, an inpalbuak nasat phah em aw ka ti. ZPM sawrkar hian MNF leh Congress in min beihrawn an ti thin, nimin lawkah te khan an Minister pakhat chuan a sawi leh a ni. Congress kan sawrkar lai khan MNF, ZNP, BJP leh party dang te min bei thin, min beihrawn kan ti ngai lo. Tunah hian insawifiah term ah kan awm mek a, an Spokesperson pawh hian insawifiahna bak sawi tur a nei lo. Sawrkar kaltawh sawichhiata in awihnun an tum em ni tih hi ka zawt duh a ni, a ti.
“Congress party chuan kan ti ang kan tih chu kan ti thin. Remna leh muanna atan lalthuthleng kan kian ang kan ti a, kan kian mai. Rangva kan sem ang kan ti a, kan sem mak a, tum hnih lai NLUP kan sem ang kan ti a, kan sem leh leh mai a ni. MNF hian thil tamtak an tiam a, an ti hlawhtling ngai lo. ZPM pawh hian tamtak an tiam a, kan enthla mek a, mipui ten an ringhlel tan a ni. Chuvangin Mizoram mipui pawn Congress ah rinna an nghat thar leh mek a ni” a ti bawk.
Ngurdingpuia Pachuau, Sr Vice President, MPYCC pawhin thu sawi in, “Kan party kan sawrkar leh ngei theih nan hun kal tawh, tun hun leh hun lo kal tur kan ngaihtuah a ngai a ni. Kan hun kal tawha kan hmalakna te, kan hnathawh te thiam taka kan puanzar theih a ngai a ni. Kan hun lo kal leh zel tur atan vawiin ni hi a pawimawh a ni tih hria ang u. Heng hi kan hmanthiam chuan kan sawrkar leh ngei ang” a ti.
Lalhmingmawia Ralte, General Secretary, MPYCC pawhin thu sawi in, “Thangthar te hian Congress sawrkar laia kan hnathawh te an hre lo, chuvangin Social media ah hian tan la thar ila, kan hnathawh te kha i aupui ve ang u” a ti bawk.
He hun hi C. Lalringliana, Secretary, MPCC chuan a kaihruai a ni.