Nimin khan C. Lalsawivunga, Art and Culture Minister chuan Lunglei Sazaikawnah District Museum sak thar a hawng a, Lunglei West bialtu MLA T. Lalhlimpuia leh LMC Councillor thenkhat bakah ZPM Southern Headquarters hruaituten an tawiawm.
Thu sawiin C. Lalsawivunga chuan,”Vawiina district Museum sak thar kan hawng ta hi Lunglei mai ni lo, Mizoram chhim lam tan hmasawnna chhenfâkawm tak a nih ka beiseia, kan pi leh pute nun dan leh an chanchin vawn that kawngah hma kan sawn zel ka beisei a, thangtharte tan rohlu kan hnutchhiah theihna hmaraw tangkai tak a nih ngei ka ring,” a ti. “Mipuite hian Art and Culture department hi pi pu sulhnu leh chindante vawnghimtua min ngaih angin kan theih tawp kan chhuah mek a ni. Tribal Research Institute lamin kan pi leh pute chanchinte uluk zawka zirin ziaka dahin min hnutchhiah a, Museum lama thawkte pawhin kan hmanlai bungraw hluite uluk takin an vawng tha bawk a, hmasawn zel tur leh tang tlang zel tur kan ni a, mipuite pawhin kan hnathawh hi an hlut chho zela, thil hlu leh bungrua dah tur kan nei a nih chuan helai hmun hi hmang tangkai turin mipuite ka ngen a ni,” a ti bawk.
Art and Culture Minister chuan,”Library te pawh hi tun aia changtlung zawk kan neih theih nan tan lak zel a pawimawh hle a, chutiang bawkin a chhawr tangkai lamah mipuite kan harh thar zel a pawimawh hle a ni. Social media-in nasa takin min luhchilh tawh mahsela, internet a mi chhiar ringawt lovin lehkhabua kimchang taka thuziakte hi chhiar kan uar deuh deuh a a pawimawh a ni,” a ti a.
“Kan pi leh pute sulhnu chhui chianga, zirchian kawngah kan archeologist ten nasa takin hma an la mek a, kan Department thlawh hma hi a zau em em a, a thawktute tlem zia ngaihtuah chuan kan inchhuang ve hle a ni,” a ti. “Mahni hnam nihna kalsan leh mausam reng reng hnam dingchhuak an awm ngai lo, chutih laiin Mizote hi hnam vannei tak kan ni a, kan pi leh pute hun ata sakhaw mumal tak kan neih hma pawhin taimak kawngahte, rinawmna leh huaisenna kawngahte in zirtirna tha tak an ko neih tawha, zo nun ze mawi tak min hnutchhiah a, hei hi thangtharte hian vawng him zel turin tan i la zel ang u. Heng museum item, kan hmanlai nunphung tarlang leh pholang theitu, hmuh leh khawih theihte hian kan hnam nihna(identity) vawnhim leh chawi lar kawngah hma min sawntir zel se la, hmuh theih leh khawih theih loh kan zo nun ze mawi hrang hrangte pawh theihtawpin i vawng nung zel bawk ang u,” a ti bawk.
He hun hi Florence Zotluangpuii, Secretary, Art and Culture Department chuan kaihruaiin Rev T. Lalsangvunga, BCM in hunserh a hmang a, F. Lalthanmawia, Dy Director, Art and Culture Department in report a pe bawk.