Champion tur inrinsiak te, chetha tur inrinsiakte hi football tihlutu leh tingaihnawmtu pakhat a ni a, inrinsiak lai period hi a nuam hranpa ve hrim hrim bawk. Football a tualchhung league ropui ber leh sum tamna ber English Premier League chu August ni 17, 2024 atangin khelh tan a ni dawn a. Supercomputer in EPL 2024/25 ah champion turin Manchester City a ring.
Pep Guardiola enkawl Manchester City hi EPL-ah vawi li champion zawn thei hmasa ber an ni a. An record siam tizau a, vawi nga champion zawn thei hmasa ber ni thei dinhmunah an ding. Ropuina rama hruai thlengtu Pep Guardiola-a’n a la enkawl zui tur hi an dinhmun that bikna a ni thei. City elpui lian tur zinga ngaih Liverpool chu Jurgen Klopp-a’n a chhuahsan a, manager thar Arne Slot-a’n a enkawl dawn. Manager thar Slot hnuaiah hma an sawn hluai thei a, an talbuai viau thei tho bawk. Liverpool ang thoin Chelsea pawhin manager thar Enzo Maresca an nei a. Enzo Maresca leh a hote tan City elphak a la har hret tura ngaih a ni. Manchester United in an manager Erik ten Hag an ruai chhunzawm dawn a. Inelna dangah champion pui khauh thin mah se Ten Hag hnuaiah United hian City lehpel turin rin an kai tak tak thei lo.
City hian manager an nei tha a, player an nei tha em em bawk. Season liam taah EPL Player of the season leh FWA Footballer of the year chawimawina dawng kawp thei Phil Foden a chhe thut dawn lo. League harsa bera ngaih EPL a top-scorer ni zawn thei Erling Braut Haaland-a’n a thiam a theihnghilh thut dawn lova, Jeremy Doku a nep sawt dawn hek lo. City hian midfielder ropui Kevin de Bruyne an kawl chhunzawm thei dawn em tih chiang rih lo mah se defensive midfielder tha ber Rodri erawh an chhawr zui ngei dawn. Rodri hi tute tan pawh inngah ngamna a ni. Tlarhnung lamah ni se Manuel Akanji, Kyle Walker, Nathan Ake leh Joško Gvardiol te tuan a fum sawt dawn dawn hek lo. Supercomputer in a rinlawk dangin City hian point 94 hmuin an champion zawn leh a ring.
Supercomputer rin lawk danin Arsenal an champion teuh leh viau dawn a, an hmelma club tantuten ‘Teuhsenal’ an tih leh hmel. Gunners hian hmasawnpuitu Mikel Artetan an ruai chhunzawm dawn a, nipui bazar inhawn laiin an squad an thuam chak a rinawm bawk. Season hnih chung chu City el phak ber an lo ni tawh a, teuh deuhin an champion lo zawn thung. Supercomputer in a rinlawk dan chuan Gunners hian khelh 38 atangin point 86 an hmu ang a, an chunga awm City chu point riatin an phak dawn lo tlat mai.
Manager thar Arne Slot hnuaia inlan tur Liverpool chuan an dinhmun ngai luah lehin, pathumna an nih chhunzawm dawn niin Supercomputer in a ringlawk. Manager thar hnuaiah an dinhmun ngai an luah phak a nih chuan Reds tan result tha a nih a rinawm.
Season liam taah FA Cup-a champion Manchester United chuan hma an sawn deuh dawrh tura ngaih a ni. Erik ten Hag ruai chhunzawm tur leh an squad thuam chak mek Manchester United hi season liam ta khan pariatna daih an ni a, season tharah chuan top 4 huangah an kir thei tura ngaih a ni.
Supercomputer hian EPL 2024/25 ah Manchester City, Arsenal, Liverpool leh Manchester United te hi top 4 huangah an intlar a ring a. Chelsea leh Aston Villa in Europa League an khel phak ang a, Tottenham in Europa Conference League an khal phak ve thung ang. EPL 2024/25 a kaisang thar pahnih Southampton leh Leicester City te inhamtang chhunzawm thei turah a ngai a. Kai thar pakhat Ipswich Town erawh championship lamah an tlak leh nghal a ring a. Ipswich Town bakah hian Nottingham Forrest leh Wolves te an tlahniam a ring bawk.
Supercomputer predicted EPL 2024/25 table
- Manchester City – 94 points
- Arsenal – 86
- Liverpool – 80
- Manchester United – 71
- Chelsea – 67
- Aston Villa – 65
- Tottenham – 63
- West Ham – 57
- Newcastle – 57
- Brentford – 57
- Crystal Palace – 47
- Bournemouth – 46
- Everton – 42
- Fulham – 42
- Brighton – 35
- Southampton – 35
- Leicester – 34
- Nottingham Forest – 32
- Wolves – 29
- Ipswich – 18