English Premier League club ropui Manchester United chuan defender thar an nei a. Rawlthar defender ngaihven hlawh tak Leny Yoro chu kum nga daih contract ziahpuiin an la lut.
Liverpool leh Real Madrid te pawhin lak luh tuma an hel Yoro hian Old Trafford-ah kum 2029 thleng cham turin contract a ziak a, kum khat dang a contract pawhsei theihna thutlung an bilh tel bawk. United in a mana an sen zat hi 62m euros thlenga pung chho thei a ni. Red Devils hian Yoro manah £52.18m an thehchhuak phawt a, a khelh that dan a zirin Lille hnenah 8m euros (£6.73m) an pek belh leh ang.
Kum 18 chauha upa ni mah se Yoro hi mualchhunga a puitlingin a khel tha thei hle. Kum 16 mi a nih laiin Lille tan a khel tan a, season liam ta khan Lille tan Ligue 1-ah vawi 32 zet a khel. Lille tan hian Ligue-1 goal hnih a thun nghe nghe. Lille tan a khelh that theih em vangin Ligue 1 team of the season ah a tel hial a. Europa Conference League quarter-final-ah Aston Villa an hmachhawn tum pawh khan a khel tha viau a, penalty shoot-out ah VIlla hi an ngam ta lo thung.
Lille tan inelan hrang hrangah a chetthat em vangin rawlthar centre-back Yoro hian ngaihven a hlawh hle. Euro-a club ropui tak tak Real Madrid, Paris St-Germain, Liverpool leh United te hian lak tumin an ngaihven a. Real Madrid a zawm hman teuh hle. Real Madrid nen inremna nei mai tura ngaih an ni chungin United hian lak tumin hma an la chhunzawm zel a, an thawhrim rah sengin an la lut thei ta a ni. Yoro hian a club thar United-ah hmun pawimawh a chang nghal kher lo a nih pawhin United defender pawimawh a nih zui thuai a beiseiawm hle thung.
FA Cup-ah an champion vanga Europa League khel tur United hian nipui bazar inhawng mekah forward Joshua Zirkzee leh centre-back Leny Yoro te an la lut fel tawh a. Lak belh tur an la melh zui zel bawk. Centre-back an awh tak Jarrad Branthwaite lak tuma an dawrna chu Everton in tum hnih an hnar tawh a, United hi an la beidawng chuang lo va, Everton chhiarna aia tlawmin lak theih an la inbeisei fan. Branthwaite lak tuma hma an lak rual hian Bayern Munich atangin Dutch defender Matthijs de Ligt lak an tum mek bawk.
United in player pahnih an lak luh tawh rual hian centre-back tawnhriat nghah Raphael Varane chuan Old Trafford a chhuahsan tawh a. England defender Harry Maguire pawhin Old Trafford a chhuahsan a rinawm viau bawk. Anni pahnih bakah hian kum 2025 a contract hmang zo mai tur Sweden defender Victor Lindelof hma lam hun tur a chiang lo mek bawk.