J.K. Dawngzuala, Chairman, ZIDCO leh Dr. Arun Kumar Sharma, Director General, NECTAR te chuan IIT, New Delhi ah inkawma hun an neia, Mizoram hmasawnna tur kawng hrang hrang awm theite an sawi dun.
Arun-a hian NECTAR kalphung hrang hrangte ZIDCO chairman hi a lo hrilha, scheme hrang hrang an neihte chu Mizoram hmasawn nan a tangkai a rin thu a lo sawipui a, puih an ngaihna apianga puih an inhuam thu a lo hrilh a ni. Solar Dehydrators (Ni zung chakna hmanga thlairah leh thei tihrona) project te pawh siama hma la turin thurawn a lo pe a, Khawl hmanga tih ro sawhthing, aieng, lakhuihthei, etc te chu international market ah a phochhuah pui theih thu a lo hrilh nghal bawk a ni.
JK. Dawngzuala, ZIDCO Chairman pawhin Mizoram sokar thara hand holding Policy leh NECTAR hmalakna chu zoram hmasawn nan thil inkawp rem tak a nih a beisei thu a hrilha, hun remchang hmasa bera Chief Minister sawipui a tum thu hrilhin, a tul ang zela DPR te siama mizoram hmasawn nana thawhho phurawm a tih thu a hrilh bawk.
Hei bakah hian Arun-a chuan thingpui hnah atanga catechin lakchhuah dante leh market tha tak a awm thute, chumi atana khawl mamawhte nei turin NECTAR chuan puih an in huam reng thu ZIDCO Chairman hi a hrilha, Mizoram tana hmasawnna kawng awm thei hrang hrangte an sawi dun hnuah JK-a chuan bawhzui ngaite bawhzui tur leh NECTAR nena thawhhona tha tak nei turin ZIDCO chu a in peih reng thu a hrilh bawk a ni.